DILI, STLTIMORLESTE.com – Prezidente Republika (PR), Jose Ramos Horta sauda delegasaun husi Singapura hodi impulsiona dezenvolvimentu sosial no ekonomiku.
Prezidente Republika, Jose Ramos Horta hasoru malu ho delegasaun ida husi Singapura akompanha husi Embaixador Timor Leste ba Singapura, Alex Tilman iha Palasiu Prezidensial Nikolao Lobato, Bairo Pite, Segunda (18/08/2025), hodi koalia kona-ba parseria estratejiku hodi promove dezenvolvimentu sosial no ekonomiku iha Timor Leste.
Liu husi inkontru Xefe Estadu trasa prioridade prinsipal nasional sira, sublina nesesidade urjente atu hadia infraestrutura bee no saneamentu hodi hasae saude publika no produtividade.
Prezidente destaka importansia atu hasae rendimentu husi agrikultor kafe lokal sira nuudar pasu importante, hodi harii prosperidade rural no ekonomia nasional ida neebe reziliente liu.
Hatan ba Prezidente nia vizaun, delegasaun Singapura nian espresa kompromisu forte atu esplora solusaun sira neebe ho asaun. Reprezentante sira konfirma, sira sei halo estudu klean, inklui vizita ida ba toeos kafe sira, hodi identifika oportunidade sira ba investimentu sira ho impaktu sosial.
Delegasaun hatoo intensaun atu ajuda transforma dezafiu atual TL nian ba negosiu sosial sustentavel sira, neebe diretamente hadia kualidade moris ba populasaun, alina ho Prezidente nia foku ba dezenvolvimentu pratiku, orientadu ba rezultadu sira.
Kolaborasaun ida nee marka pasu signifikativu ida hodi hametin lasu entre TL no Singapura, liu-liu bainhira nasaun nee prepara ba nia papel ativu iha ASEAN.
Delegasaun husi Singapura fo hanoin kona-ba sira nia esperiensia ba dezenvolvimentu iha sira nia nasaun, hodi oferese sira nia esperiensia nuudar modelu ba transformasaun no inspirasaun ba TL.
(eme)
