DILI, STLTIMORLESTE.com – Prezidente Republika (PR) Jose Ramos Horta sei hatoo diskursu iha Konselhu Direitus Umanus ONU iha Jenebra no halao enkontru bilateral ho Prezidente Macron iha Paris.
Prezidente no Laureadu Nobel ba Pas, Jose Ramos Horta, iha Sabadu (21/02/2026) hahu vizita ofisial ida ba Jenebra no Paris, husi loron 22 too 25 fulan Fevereiru tinan 2026.
Ida nee hatudu kompromisu metin Timor Leste nian ba multilateralizmu no direitus umanus, hodi kontinua hametin relasaun bilateral ho Republika Fransa.
Iha loron 23 Fevereiru, Prezidente Ramos Horta sei hatoo diskursu prinsipal iha Sesaun ba dala 61 hosi Konselhu Direitus Umanus ONU nian iha Jenebra. Ninia ajenda inklui enkontru kortezia ida ho Komisariu Aas ONU nian ba Direitus Umanus. Volker Türk, no ho Tedros Adhanom Ghebreyesus, Diretor Jeral Organizasaun Mundial Saude (OMS), reforsa Timor Leste nia dedikasaun ba promosaun rezilensia saude publika global.
Iha jestu divulgasaun diplomatiku, Misaun Permanente Timor.Leste nian iha Jenebra sei sai uma nain ba almosu ofisial ida, hodi halibur reprezentante sira husi ASEAN no Komunidade País sira Lian Portugés nian (CPLP), hamutuk ho dignitariu sira seluk no belun sira hosi Timor Leste neebe partisipa iha sesaun Konsellu Direitus Umanus nian. Vizita ida-nee sei inklui mos ho jantar ida ho xefe bankada CPLP nian sira.
Tuir nia kompromisu sira iha Suisa, Prezidente Ramos-Horta sei halo viajen ba Paris ba vizita serbisu ofisial ida iha loron 24 fulan-Fevereiru no sei hasoru Prezidente. Emmanuel Macron, iha Palásiu Élysée, iha loron Kuarta feira, 25 Fevereiru. Diskusaun sira nee sei foka ba reforsu kooperasaun bilateral no rezolve dezafiu global sira neebe komun, inklui asaun klimatika no diplomasia kultural.
“Iha Jenebra, ita fila fali ba konxirnsia moral mundu nian—Nasoins Unidas—hodi afirma katak dignidade umana laos luxu maibe mak fundasaun ba dame nian. Hau nia enkontru sira iha Konselhu Direitus Umanus no ho OMS hanesan kontinuasaun ida husi ita-nia konviksaun katak mundu ida neebe justu mak mundu ida neebe saudavel no livre. Iha Paris, hau-nia enkontru ho Prezidente Macron sei sai hanesan oportunidade ida atu aprofunda amizade entre ita-nia republika rua no atu esplora fronteira foun sira ba kooperasaun nian. Timor Leste bele kiik iha jeografia, maibe ita la iha limite iha ita nia kompromisu ba família nasaun sira nian,” dehan PR Horta.
Prezidente Ramos Horta tuir planu sei konklui vizita serbisu ofisial iha Paris iha loron 25 fulan Fevereiru no sei too fila fali mai Díli iha loron 27 fulan Fevereiru tinan 2026.
(eme)
