DILI, STLTIMORLESTE.com – Komemorasaun 20 Maiu, Prezidente Republika Jose Ramos Horta sei kondekora juiz no sidadaun hotu neebe servisu iha setor justisa kontribui liu ona tinan 20.
Prezidente Republika Jose Ramos Horta hatoo kestaun nee ba jornalista sira bainhira remata halo vizita ba Tribunal Rekursu iha Kaikoli, Sesta (16/05/2025).
“Ba juiz sira hotu-hotu, pur ezemplu hau fo kondekorasaun ba elementus barak husi MNEK neebe kumpri ona 20 anos sira mak hahu iha MNEK, entaun ita la konsege halo dala ida hau mos hanoin tiha ona laos agora, kleur ona atu fo kondekorasaun sira neebe servisu iha setor judisiariu mais 20 anos ona,” katak PR Horta.
Prezidente Republika hatete, kondekorasaun nee laos deit ba sira boot deit maibe sira neebe iha Prokurador Jeral Republika, Defensoria Publika embora instituisaun seluk mos hola parte iha setor justisa.
“Nee ba sira hotu laos deit sira be foin asumi funsaun nee lae, juiz konselheiru sira hotu neebe kumpri ona 20 anos,” dehan Prezidente Republika.
Xefe Estadu hatete, Prezidente Republika sei fo kondekorasaun ba juiz sira neebe mak servisu iha area justisa neebe servisu tinan 20 ona.
“Sei kondekora Ordem Timor Leste, iha kategoria 4 mak hanesan Graden Kolar, Kolar, Meritu Medalha no insige,” katak nia.
Kondekora ba eis Prezidente Tribunal Rekursu ho eis prokurador Jeral Republika sei kondekora ho Kolar tanba Grande Kolar nee ba deit Xefe Estadu, Xefe Governu, Rei.
Prezidente dehan, lo-loos nee iha 20 Maiu maibe Prezidente iha hanoin halo antes tanba babain Prezidente kondekora iha 19 Maiu tanba 20 Maiu serimonia loron boot tau tan atividade seluk ema neebe sofre liu mak F-DTL neebe hamriik iha loron manas.
“Entaun hau buka habadak halo iha Palasiu Lahane iha 19 lokraik, dia 20 ami sei haree lai ajenda,” hakotu Prezidente.
(eme)
