BAUKAU, STLTIMORLESTE.com – Prezidente Republika (PR), José Ramos Horta planeia sei lori Premiadu Nobel sira iha mundu mai Timor Leste (TL).
“Hau planu tiha ona iha 2026 fulan Agostu ita iha enkontru boot ida iha Timor, premiu nobel sira sei mai Timor Leste,” informa PR José Ramos Horta liu husi nia diskursu, bainhira partisipa iha serimonia abertura feira ba loron fundasaun Baukau dala 166, iha Vila Antiga, Baukau, Kinta (01/05/2025).
PR Horta katak, Premiadu Nobel neebe sei mai Timor Leste, tuir planu sei mai iha fulan Agostu tinan 2026 pur-volta nain 30, laos deit Premiadu Nobel ba Paz nian, maibe Premiadu Nobel ba siensia kompostu medisina, fizika, kimikas no ekonomia, tanba objetivu fahe esperiensia.
Aleinde nee mos sai simeira ida ba Premiadu Nobel sira nian no personalidade mundial neebe enkontru boot liu iha ASEAN nian, neebe fulan Agostu tinan 2026 sei realiza iha Timor Leste.
“Preparasaun hahu daudaun ona, konvite hau halo nain 7 simu ona haruka deit iha WhatsApp sira responde sei mai, premiu nobel literatura boot ida simu nia hateten mai,” PR Horta informa.
José Ramos Horta hateten, husi Premiadu Nobel nain 30, nain 7 hahu simu ona konvite inklui Premiadu Nobel literatura boot ida iha mundu sei mai iha Timor Leste no seluk kontinua konvite liu husi WhatsApp.
Horta argumentu, prezensa Premiadu Nobel sira atu lori Timor ba mundu no inspira joven sira atu estuda.
(tom)
