DILI, STLTIMORLESTE.com – Prezidente Republika (PR), Jose Ramos Horta sei partisipa Premiu Zayed Ba Fraternidade Umana 2026 Iha Abu Dhabi.
Ohin Segunda (02/02/2026) Prezidente Republika Jose Ramos Horta halao vizita privadu ou trabalhu ba Abu Dhabi, Emiradu Arabe Unidu, husi loron 3 too loron 5 fulan Fevereiru tinan 2026, hodi partisipa iha serimonia no forum anual ba Premiu prestijiozu Zayed Fraternidade Umana 2026.
Premiu Zayed ba Fraternidade Umanu maka premiu internasional anual ida neebe fo onra ba ema no entidade sira neebe serbisu ho laran luak hodi halo ponte ba divizaun sira no haburas ligasaun umana neebe signifikativa, dala barak ho sakrifísiu pesoal neebe boot.
Prezidente Ramos Horta, defensor global preminente ida ba fraternidade umana no eis-membru ida husi komisaun juri nia ba premiu nee, hetan konvite atu koalia iha Majlis Fraternidade Umanu nian iha loron 3 Fevereiru.
Iha sesaun abertura ho títulu “Resposta UmanitAria iha asaun Lidera ho Korajen, Kompaixaun & Integridade, iha Muzeu Nasional Zayed. Majlis konvoka líder no peritu distintu sira hodi diskute dezafiu global sira no dalan ba pas.
Iha loron 3 Fevereiru, Prezidente sei hasoru malu ho futuru diplomata sira nuudar orador konvidadu iha Akademia Diplomatika Anwar Gargash (AGDA), no sei hasoru malu mos ho S.E. Mohamed Saif Al Suwaidi, Diretor Jeral ba Fundu Dezenvolvimentu Abu Dhabi nian, hodi diskute kona-ba parseria ba dezenvolvimentu.
Iha loron 4 fulan Fevereiru, Prezidente Ramos Horta sei halo vizita kortezia ba Sua Alteza Sheikh Mohamed bin Zayed Al Nahyan, Prezidente Emiradus Arabes Unidus. Tuir mai, Prezidente sei partisipa iha Serimonia Premiu Zayed ba Fraternidade Umanu 2026 iha Memorial Fundador fatin istoriku ba asina Dokumentu kona-ba Fraternidade Umana iha tinan 2019.
Prezidente Republika Jose Ramos Horta hatete Timor Leste halo istoria iha tinan 2022 nuudar nasaun dahuluk neebe formalmente adopta Dokumentu ida nee ba iha ninia valor nasional sira.
Onradu ba Premiu Zayed 2026 mak akordu istoriku kona-ba pas entre Armenia no Azerbaijaun, no defensor edukasaun ba labarik-feto Afghan nian, Zarqa Yaftali.
Konklui ninia vizita iha loron 5 fulan-Fevereiru, Prezidente Ramos Horta sei partisipa iha Simeira Governu Mundial nian iha Dubai, hamutuk iha sesaun plenaria ida kona-ba forma governasaun iha futuru.
Prezidente Ramos Horta hateten ida nee hanesan testamunha ba Timor Leste nia hakarak universal pas no respeita ba malu.
“Vizita ida-nee nuudar testemuna klean ida ba ita-nia hakarak universal ba pas no respeitu ba malu. Timor-Leste nia adosaun pioneira ba dokumentu kona-ba Fraternidade Umana deklara ita nia karakter nasional. Partisipa iha dialogu global ida nee reforsa ita nia dever atu defende kompaixaun no dialogu nuudar pilar fundamental ba mundu ida neebe justu no dame liutan,” dehan PR Horta.
Xefe Estadu dehan kompromisu nivel aas ida nee sublina Timor Leste nia papel ativu iha diskursu umanitariu global no ninia kompromisu atu promove pas internasional, solidariedade no komprensaun ba malu, no mos hametin relasaun bilateral ho Emiradus Arabes Unidas.
(eme)
