DILI, STLTIMORLESTE.com – Prezidente Republika (PR), Ramos Horta sei partisipa iha tomada de pose Prezidente Português nian no hatoo diskursu iha XIII Forum Global Baku.
Prezidente Republika Jose Ramos Horta hahu viajen servisu ba Portugal iha loron 8 too 10 fulan Marsu no Republika Azerbaijaun nian iha loron 11 too 12 fulan Marsu tinan 2026. Iha nia kapasidade nuudar Prezidente Republika no Prezidente Komunidade Países Lingua Portuguesa (CPLP), Prezidente Ramos Horta sei marka prezensa iha serimonia tomada de posse ba Sua Antonio Jose Seguro nuudar Prezidente Republika Portuges nian.
Serimonia ofisial nee sei halao iha loron 9 fulan-Marsu iha Asembleia Republika. Seguro manan iha segunda volta eleisaun prezidensial portuges nian iha loron 8 Fevereiru tinan 2026. Hafoin serimonia, Prezidente Ramos Horta sei partisipa iha almosu ida neebe organiza hosi Prezidente foun eleitu Portugal nian no Primeira Dama.
Vizita ida nee sublina ligasaun neebe klean no metin entre Timor Leste no Portugal. Ho abut iha istoria no hametin dezde Timor Leste nia restaurasaun independensia, relasaun bilateral nee karakteriza ho kooperasaun neebe metin. Portugal sai nafatin parseiru xave iha dezenvolvimentu Timor Leste nian, hodi fo asistensia vital iha setor krítiku sira hanesan edukasaun, kuidadu saude, infraestrutura no kapasitasaun administrasaun publika.
Prezidente Ramos Horta sei remata ninia vizita ba Portugal iha loron 10 fulan Marsu no viajen ba Baku, Azerbaijaun, hodi halao vizita trabalhu husi loron 11 too 12 fulan Marsu.
Prezidente Ramos Horta sei partisipa iha XIII Forum Global Baku nian, neebe iha tinan nee ho tema, halo ponte ba divizaun sira iha mundu ida neebe iha tranzisaun nia laran. Prezidente Ramos Horta tuir planu sei hatoo diskursu espesial ida durante serimonia abertura forum nian iha loron 12 fulan Marsu, hamutuk ho distintu grupu líder mundial sira neebe inklui S.E. Sr. Ilham Aliyev, Prezidente Republika Azerbaija S.E.. Sr. Bajram Begaj, Prezidente Republika Albania, S.E. Sr. Jakov Milatović, Prezidente Montenegro nian, S.E. Sra. Gordana Siljanovska-Davkova, Prezidente Republika Masedonia Norte, S.E. Sr. Željko Komšić, Xefe Prezidensia Bosnia no Erzegovina.
Forum Global Baku estabelese ona nia aan nuudar plataforma prinsipal iha Europa Leste, Caucasu Sul, Azia Sentral, no Mediu Oriente, neebe halibur xefe Estadu no governu sira, líder sira setor privadu nian, Laureadu Nobel sira, no figura proeminente sira sosiedade sivíl nian.
Forum 2026 halibur iha tempu krítiku ida tanba sistema internasional infrenta tranzisaun ida neebe difisil no la estavel. Ho polítika global neebe maka define beibeik hosi rivalidade entre poder boot sira, sesaun sira sei ezamina oinsa fratura sira-nee fo impaktu ba domíniu militar, ekonomika, teknolojika no ambiental. Diskusaun sira-nee ho objetivu atu identifika oportunidade estratejiku sira iha neebe kooperasaun renovadu no koligasaun pragmatiku sira bele rezolve vulnerabilidade komun no avansa ajenda global sira, husi asaun klimatika ba dezenvolvimentu sustentavel.
Durante nia vizita serbisu, Prezidente Ramos-Horta sei halao mos enkontru bilateral ho Prezidente Republika Azerbaijaun, S.E. Sr. Ilham Aliyev. Republika Demokratika Timor Leste no Republika Azerbaijaun mantein relasaun diplomatika dezde 05 Abril 2004, relasaun ida neebe define husi respeitu ba malu no kompromisu hamutuk ba kooperasaun multilateral. Maski jeografikamente dook, envolvimentu bilateral aumenta ona liuhusi dialogu nivel aas. Marka signifikativu ida maka enkontru entre Prezidente Ramos Horta no Prezidente Aliyev iha marjen sira husi Forum Internasional Nizami Ganjavi ba dala 10 iha Baku iha Marsu tinan 2023. Diskusaun nee loke dalan sira ba kolaborasaun potensial iha setor sira hanesan enerjia, edukasaun, no agrikultura, neebe alina ho prioridade sira dezenvolvimentu nasional Timor Leste nian no perísia Azerbaijannian iha governasaun petroleu no gas.
“Vizita ba Portugal hanesan onra ida neebe klean, hodi permite hau felisita pesoalmente Prezidente eleitu Antonio Jose Seguro ba ninia vitoria desizivu no reafirma lasu fraternu neebe labele kotu entre ita nia nasaun rua. Ita-nia parseria, neebe harii iha istoria no lian komun, kontinua sai hanesan pilar fundamental ida husi jornada dezenvolvimentu Timor Leste nian, Tuir mai, iha XIII Forum Global Baku, hau sei kontribui ba dialogu global ida neebe vital. Iha era tranzisaun no divizaun neebe klean, importante ba líder sira atu halibur hamutuk, hodi sai ponte ba diferensa sira, no koletivamente konstrui dalan ida ba orden mundial ida neebe kooperativu, pasífiku no sustentavel liu,” hatete PR Horta liu husi Komunikadu neebe STL asesu Sabadu (07/03/2026).
Prezidente Ramos Horta sei husik Baku, Azerbaijaun iha loron 13 fulan Marsu no tuir planu sei fila hikas mai Díli iha loron 15 fulan Marsu tinan 2026.
(eme)
