DILI, STLTIMORLESTE.com – Prezidente Republika (PR), José Ramos Horta deklara katak, nia parte seidauk simu lista indultu, tanba nee seidauk bele fo komentariu klean kona-ba ida nee.
“Hau seidauk simu, kuandu hau simu hau tur koalia ho sosiedade sivil, Provedor Direitus Humanus no Justisa, koalia ho Primeiru Ministru,” dehan Prezidente Republika, Jose Ramos Horta ba jornalista sira iha Bebora, Kuarta nee (14/05/2025).
Nia hatutan, iha kazu rua, balu moras Tribunal rasik autoriza nia hela iha uma, seluk tinan 80 ka 90, maibe seidauk hatene kona-ba relatoriu no sistema neebe mai husi Prizaun, tanba nee labele fo komentariu se se mak hetan indultu, no mos informasaun konaba eis Padre nian, iha lista ka lae, tanba nee seidauk fo komentariu tanba seidauk hatene.
PR informa, tuir saida mak PR rona lista neebe atu hetan indultu 30 resin.
Hatan kona-ba se eis Padre iha duni lista fo indultu ka lae, PR dehan seidauk haree lista, tanba nee seidauk bele koalia kona-ba ida nee.
Iha fatin ketak, Diretor Nasional Servisu Prizional no Reinsersaun Sosial, Delfio Soares Alves dehan, indultu ida agora la iha Kriteria.
“Indultu ida agora la iha Kriteria, la hanesan ho lei ida uluk Kriteria la iha, neebe hau hanesan Diretor Nasional ami fokus liu ba sira neebe idade mais avansadu ho situasaun moras, bele diagnosa katak se karik PR konsidera sira nee hetan indultu, sira nee sei produtivu sei halo tan problema ka lae ida nee tetu hotu,” dehan nia.
Nia hatutan, lista indultu proponente mai husi Prizaun hamutuk 38 pesoas, neebe enkamina ona ba iha Gabinete Prezidente Republika.
Sublina, kona-ba sira neebe proponente fora husi prizaun seidauk, hanesan sira neebe liu husi familia ka advogadu mak hatama pedidu nee seidauk.
Reforsa, husi numeru neebe iha sira neebe moras bele iha nain 10 ba leten no sira nee proponente mai husi Diretor Prizaun nain 3 nee.
Diretor nee afirma, lei ida agora atu hetan indultu nee la iha kriteria, no proponente sira neebe mai husi Prizaun mezmu la iha lei, no ida neebe haree fo prioridade liu haree mos ba razaun humanidade bele propoin.
Hatan kona-ba lista nee inklui mos Padre Daschbach nia parte dehan, seidauk serteza no seidauk haree, no lei neebe iha la iha Kriteria, maibe haree ba iha razaun humanitaria, no mai husi prizaun rasik.
Aleinde nee Diretor Prizaun Gleno, Cristianho Salsinha dehan katak, Prizaun Gleno sira propoin lista indultu nain 5.
“Ami propoin nain 5 deit, nain 5 nee pedidu husi Prizaun nian, pedidu se husi familia sira ba direta Gabinete Prezidente nian,” dehan nia.
Hatutan tan, sira nain 5 neebe Prizaun propoin haree ba iha razaun humanitaria, tanba bazeia ba lei neebe iha.
Tuir dadus neebe iha, oras nee daudaun dadur iha prizaun tolu hanesan Bekora, Suai no Gleno akomula dadur hamutuk atus neen neen nulu resin sia (669), numeru guarda Prizional foin lalais rekruta tan atus ida (100), maibe iha administrativa nia prosesu foin mak hetan hitu nulu rersin rua (72).
(ter)
