DILI, STLTIMORLESTE.com – Prezidente Republika (PR), Jose Ramos Horta hatete, nia seidauk simu lista indultu husi Governu liu husi Ministeriu Justisa.
Prezidente Republika Jose Ramos Horta hatoo kestaun nee ba jornalista sira, bainhira remata vizita Expo iha Universidade Catolica Timorense (UCT) iha Balide, Tersa (25/11/2025).
Nia hatete, too oras nee seidauk simu lista husi Governu atu bele fo indultu ba prizoneiru sira iha ambitu selebrasaun loron proklamasaun unilateral independensia ba dala- 50.
“Hau seidauk simu lista indultu, lista final husi governu hau seidauk simu,” dehan Horta.
Antes nee Prezidente Republika, Jose Ramos Horta ba jornalista hatete nia simu ona proposta husi Ministeriu Justisa, nomos sistema prizional sira, nunee Xefe Estadu sei fo indultu ba prizoneiru sira hamutuk nain haat ka nain neen hanesan nee iha ambitu selebrasaun loron proklamasaun independensia ba dala 50 neebe sei akontese iha 28 Novembru 2025.
PR Horta dehan, simu ona proposta, rekomendasaun mai husi Ministeriu Justisa mai husi sistema prizional, maibe seidauk halo desizaun.
Jornalista: Emerenciana Pinto
Editora: Domingas Gomes
