DILI, STLTIMORLESTE.com – Prezidente Republika (PR) Jose Ramos Horta hatete, maske propsota atu taka Institutu Publiku (IP) no Empreza Publika (EP), maibe PR seidauk simu husi Governu.
Prezidente Republika Jose Ramos Horta hatoo kestaun nee ba jornalista sira, bainhira remata vizita Eskola Ensinu Baziku Filial (EBF) Farol, Dili, Kinta (03/04/2025).
Nia hatete, ohin hasoru malu ho Primeiru Ministru la koalia kona-ba EP-IP, tanba antes nee koalia ona, no oras nee proposta lei nee iha ona, maibe Prezidente seidauk simu husi Governu.
PR Horta dehan, nia parte konkorda 100% taka IP no EP tanba gasta osan demais la servisu, asesor sira neeba manan osan boot, diretor manan osan boot liu fali Prezidente Republika, Primeiru Ministru, Ministru sira, depois rezultadu laiha nee abuzu boot ida, Governu halo desizaun asertada atu kansela tiha lubuk ida.
“Hau mak seidauk simu proposta kona-ba taka IP no EP sira, hau simu karik hau aprova ona,” dehan PR Horta.
Nunee mos Primeiru Ministru, Kay Rala Xanana Gusmão dehan, ema neebe naok osan estadu no gasta osan arbiru mak IP no EP. Tanba nee, fou-foun kedas Governu hakarak muda IP no EP, maibe Konselhu Ministru hasai ona dekretu lei ida, neebe informa ba Prezidente Repúblika sei mai iha nee PR promulga.
“Buat ida hau bele dehan gasta osan estadu nian arbiru, naok osan estadu nian arbiru mak IP no EP, tanba husi lei neebe kria tiha IP no EP dehan sira autonomia administrativa finanseira, buat sira nee hotu ema ida labele book,” katak PM Xanana.
Husu ba hotu-hotu lalika tauk, halo auditoria interna nee bolu atensaun mak la kumpri dala ida, dala rua informa mai hau atu hasai tiha.
Tanba IP no EP, aat liu mak iha ADN, CNA, MPM problema boot, EDTL, BTL buat oin-oin. Nee duni hasai tiha ona dekretu lei ida bainhira Prezidente Repúblika promulga.
PM dehan, kontente tebes-tebes tanba Governu aprova ona atu book daudaun ona IP no EP, agora atu dehan halo auditoria sira nee arkivu laiha, mai dehan buat ida laiha atu prova, tanba nee mak dijitalizasaun mos asuntu ida neebe lao daudaun.
(eme)
