DILI, STLTIMORLESTE.com – Prezidente Republika (PR), Jose Ramos Horta iha nia mandatu nuudar Prezidente Republika sempre buka fo apoiu ba povu kbiit laek sira nomos apoiu mos sidadaun neebe hela iha fatuk kuak.
Tuir observasaun neebe mak STL hetan, maske Prezidente Republika Jose Ramos Horta preokupa ho servisu estadu nia iha rai liur no rai laran maibe bainhira rona informasaun ruma husi media sosial ka media nasional liga ho povu nia moris Prezidente Republika sempre haruka ekipa Prezidensia Repúblika buka fo apoiu, no balun presidente tun haree direita.
Tuir pajina ofisial Presidente Republika Jose Ramos Horta hatete, Prezidensia Republika liu husi asesor servisu social asunto sociedade sivil visita avo maria da costa ho idade tinan 63 deside hela mesak deit iha fatuk kuak iha area Badunau, Aldeia Lulihene, Suku Bucoli postu Baukau, Minisipiu Baukau,
”Avo Maria hela deit iha fatuk kuak durante tinan 10 ona, espera bele hetan tulun husi ema laran luak. Avo maria hola mane ema husi suku bahu no kous oan mane nain 2, wainhira nia kaben mate, nia deside mai hela ho nia maun iha area badunau bucoli no wainhira nia maun mate nia deside hela mesak iha fatuk kuak ida ho nia medida luan kuase metro 2, fatuk kuak ne mak sai hanesan mahon ba nia hodi satan, udan, anin, mahowen no loron nia manas,” dehan pr horta.
Aleinde nee iha loron Kuarta (23/07/2025) Prezidensia Republika liu husi unidade servisu ba sosiedade sivíl no asuntu sosial (sssas), halaoo visita hodi fo apoiu sosial ba família hamutuk 80 neebe nia plantasaun hetan destruisaun tanba inundasaun boot iha Aldeia Iun, Suku Iliheu, Postu Administrativu Manatutu Vila, Munisípiu Manatutu.
Iha visita nee, Asesor Quintiliano Monis akompanha husi nia ekipa no autoridade lokal sira, entrega ajuda emerjensia, inklui fos, roupa, sasan dapur nian, mina, sabaun ba haris, sabaun ba fase roupa, no sasan esensial sira seluk, hodi hatan ba situasaun difisil neoebe família afetadu sira esperiensia.
(eme)
