DILI, STLTIMORLESTE.com – Prezidente Republika (PR), Jose Ramos Horta simu jornalista ou juventude vietname ba meza redonda kona-ba diplomasia juventude envolvimentu demokratiku no harii dame ezemplu husi Vietname.
Iha loron Tersa lokraik, Prezidente Republika Jose Ramos Horta simu jornalista no Ativista Juvenil Vietnam nian ho idade 14, Johnny Thai, iha Palasiu Prezidensial Nicolau Lobato ba diskusaun meza redonda Kona-ba diplomasia juventude, envolvimentu demokratiku, no harii dame, ho foku ba ezemplu husi Vietnam nian.
Eventu nee halibur alunu sira husi Parlamentu Foin-sae, estudante sira, ofisial governu, no reprezentante sosiedade sivíl sira ba dialogu ida neebe ezamina esperiensia Vietnam nian iha reziliensia rejional no dezenvolvimentu neebe lidera husi foin-sae sira. Eventu nee ho objetivu atu promove diskusaun entre jerasaun sira kona-ba papel juventude nian iha formasaun relasaun diplomatika, hametin partisipasaun demokratiku, no promove harii dame iha Sudeste Aziatiku.
Bainhira remata ho meza redonda Prezidente Republika Jose Ramos Horta ba Jornalista iha palasiu Tersa lokraik (31/03/2026) hatete, joven nee husi vietname ida estudante 14 anos maibe nia mos hakarek ona.
“Nia husi Vietname 14 anos maibe nia mos hakerek ona hanesan jornalista iha jornal revista iha vietname neeba matenek tebes, hau foin mak konhese maibe hakarek ba malu liu husi email, tanba nia hetan hau nia email nia hakerek no hau responde, hau haree nia 14 anos deit ho maturidade ho matenek hau admira hakerek ba jornal sira nia haruka buat neebe nia hakerek entau konvida nia mai para haree timor no nia sei hakerek konaba Timor Leste iha vietname,” dehan Prezidente Republika.
Prezidente Ramos-Horta elojia Johnny Thai nia vizaun no aten-barani, Prezidente sente onradu atu simu Johnny Thai iha Timor-Lestejoven ida neebe nia aten-barani, intelektu, no dedikasaun ba pas enkarna espíritu neebe tenke haburas iha jerasaun lider sira tuir mai. Ho deit idade 14, nia hatudu ona katak mundu laos hanesan barreira ida atu kontribui ba umanidade komun.
Ninia jornada husi jornalista joven ida iha Vietnam ba partisipante ida iha Sesaun diskusaun meza redonda nianhanesan testemunha ida ba saida maka posivel bainhira fiar no fo kbiit ba foin-sae sira. Johnny nia lian maka fo hanoin makaas katak ponte sira amizade no komprensaun entre nasaun no povu sira harii laos deit hosi governu, maibe husi indivíduu sira neebe ho vizaun atu haree futuru ida neebe diak liu.
Sesaun diskusaun meza redonda nee iha diskursu prinsipal ida husi Johnny Thai, jornalista ho tinan 14 no komentador estratejiku hosi Sidade Ho Chi Minh, Republika Sosialista Vietnam nian. Estudante ida iha Eskola Internasional Aziatiku neebe prestijiozu, nia hahu ninia kareira jornalizmu iha tinan 2022 no kontribui ona ba publikasaun prinsipal sira iha Azia, inklui Asia Times, Asia Sentinel, Youth Press Agency, no Vientiane Times.
Ninia konvite atu koalia iha Palasiu Prezidensial marka dala uluk jornalista foin-sae ida ho ninia idade hetan onra ida nee husi Prezidente J. Ramos Horta.
Iha biban nee Johnny Thai sublina lasu istoriku neebe klean entre Vietnam no Timor-Leste nuudar nasaun reziliente neebe unidu husi luta partilhada ba independensia.
Johnny dehan hanesan onra boot ida mai iha Dili fuan no pulsa Timor-Leste nian, no koalia iha Lider ida nia oin neebe nia korajen no kompaixaun laos deit kona povu Timor nia fuan maibe mos muda konxiensia mundu nian.
“Lasu entre Vietnam no Timor-Leste laos deit amizade diplomatiku ida maibe hanesan armonia espíritu nian iha hanoin no fuan nasaun reziliente rua nee. Empatia entre povu rua nee mak aguenta ona opresaun no kolonizasaun estranjeiru, sofre moras no lakon barak, maibe liuhusi luta neebe makaas hetan fali independensia iha ohin loron. Ida-nee hanorin mai ami-nia jerasaun foin-sae sira katak: dame laos prezente ida, maibe responsabilidade ida. Hau bolu hau-nia jerasaun sira atu sai Jerasaun Sem Fronteiras, hodi hakat liu nuudar susesor funu nian ba arkitektu dame nian, uza ita-nia aten-barani atu tau matan no ita-nia enerjia atu harii ponte sira iha ita-nia uma komun ASEAN,” hateten Johnny Thai.
Sesaun diskusaun meza redonda tuir kedas ho sesaun pergunta no resposta neebe modera husi Salus, membru Parlamentu Foinsae. Atu tradus vizaun ba asaun, jornalista foin-sae nee propoin estabelesimentu Konsellu Konsultivu Juventude ASEAN nian hodi fo ba foin-sae sira lian formal ida iha polítika governu nian, hamutuk ho kriasaun Asosiasaun Amizade Vietnam-Timor-Leste neebe dedikadu atu diriji interkambiu kultural no kooperasaun ekonomika.
Eventu nee marka momentu signifikativu ida iha envolvimentu juventude Timor-oan no Vietnam nian, hodi reforsa kompromisu nasaun rua nian atu investe iha lider joven sira nuudar motor ba pas neebe sustentavel.
(eme)
