DILI, STLTIMORLESTE.com – Prezidente Republika (PR) Jose Ramos Horta simu karta agradesimentu husi Prezidente Filipina, Ferdinand R. Marcos Jr ba solidareidade Timor Leste nian hafoin anin Tufaun iha Filipina.
Karta agradesimentu formal nee simu iha loron Kuarta (04/02/2026). Karta nee rekonhese no apresia mensajen simpatia no kompaixaun neebe hatoo hosi Prezidente Ramos Horta no povu Timor Leste hafoin devastasaun neebe kauza hosi tufaun Tino (Kalmaegi) no Uwan (Fung-wong).
Iha loron 13 fulan-Novembru tinan 2025, Prezidente Ramos Horta hatoo tristeza profunda no solidariedade klean liu hosi povu Timoroan sira ho sidadaun sira neebe afetadu husi tufaun sira, neebe rezulta iha trajiku lakon vida, dezlokasaun massa, no estragus signifikativus.
Iha nia karta, Prezidente Ramos-Horta hateten ho triste simu notisia trajiku konaba devastasaun neebe kauza husi tufaun Fung-wong.
“Ho tristeza boot mak hau simu notísia trajiku kona-ba devastasaun neebe kauza husi tufaun Fung-wong. Hau hakarak hatoo ba Sua Exelensia, ba Governu no ba povu Filipina, hau nia kondolensia sinsera no solidariedade neebe klean husi Timor Leste nian. Povu Timor Leste fahe sira-nia tristeza no kompaixaun durante periodu lutu no susar nee, no ami espresa ami nia admirasaun ba korajen, reziliensia, no espíritu ajuda-malu neebe sempre karakteriza povu Filipina sira wainhira hasoru susar,” dehan PR liu karta neebe antes nee haruka ba Filipina.
Iha ninia resposta, Prezidente Ferdinand R. Marcos Jr. hatoo apresiasaun klean husi Governu no povu Filipina nian ba Timor-Leste nia espresaun solidariedade.
“Hodi Governu no povu Republika Filipina nia naran, hau hatoo hau-nia agradesimentu ba ita-boot sira-nia espresaun solidariedade no kompaixaun. Mensajen simpatia ida husi ita-nia maun-alin timoroan sira fo forsa mai ami atu ultrapasa devastasaun. Hau mos espesialmente sente ho ita boot sira-nia Governu nia oferese ho laran-luak atu haruka misaun umanitariu ida. Maski Timor Leste membru foun liu iha familia ASEAN, maibe hatudu ona ninia disponibilidade atu fo ho generozidade aktu magnanimidade ida neebe sei hanoin nafatin,” dehan PR Filipina.
Nia hatete, fundamentu iha relasaun amigavel neebe kleur ona ho Filipina, nuudar futuru Prezidente foun ASEAN nian, hein atu serbisu hamutuk ho Timor Leste kona-ba asuntu sira neebe iha interese komun.
Troka karta ida-nee reafirma lasu amizade neebe metin, respeitu ba malu no solidariedade rejional entre Timor Leste no Filipina.
(eme)
