DILI, STLTIMORLESTE.com – Prezidente Republika (PR), Jose Ramos Horta simu karta kredensial husi Ralf Beste, Embaixador Estraordinariu no Plenipotensiariu foun Republika Federal Alemanha nian ba Republika Demokratika Timor Leste.
Bainhira remata halo enkontru kortejia, Sekretariu Jeral Ministeriu Negosiu Estranjeiru mo Kooperasaun (MNEK), Juvencio de Jesus Martins ba jornalista iha Palasiu Prezidensial Nicolau Lobato, Dili, Sesta (30/01/2026) hatete, ohin Prezidente Republika Jose simu karta kredensial husi Embaixador Alemanha mai Timor Leste.
“Ohin ita simu ita nia bainaka ida husi Jakarta, Embaixador Federasaun Alemanha nian ba Indonezia nunee mos mai Timor, nia mai hodiseik, ohin mai aprezenta nia karta kredensial ba Prezidente Republika para sai mos hanesan Embaixador Extraordinariu Plenipotensiaria Republika Alemanha ba Timor Leste akredita mos Jakarta. Alemanha belun boot, Timor Leste nia parseriu dezenvolvimentu boot tebes, sira mak momentu neeba populasaun iha nesesidade boot mai ajuda area transporte nian, sira fo primeiru Roo ida, segundu fo tan roo rua nee mak Berlin Nakroma ho Ramelau I, Roo rua nee agora halo hela serbisu tula ita nia populasaun husi Dili ba Atauru, Oecusse. Haree tok ita sei explora tan oportunidade seluk iha area seluk tan para ita bele hamutuk ho sira iha futuru,” katak nia.
Sekretariu Jeral mos dehan, importante mak haree katak Alemanha tuir saida mak sira koalia, katak sira haree Timor hanesan mos pais ida sira simpatiza, admira, no sira hakarak mos atu nafatin tulun Timor iha area hotu-hotu, iha area bilateral nomos multilateral.
“Kontinuasaun esperitu koperasaun ita ho sira mak ejiste ona nee ita sei explora hamutuk fali ho Ministeriu negosiu estranjeiru hodi haree took iha area seluk mak ita sei identifika hamutuk ho sira iha ambitu bilateral nia atu nunee saida mak ita bele kopera hamutuk ho sira hodi bele indetifika hodi bele kopera hamutuk,” katak nia.
Nia dehan, iha area multilateral eziste no agora Timor fo apoiu ba sira iha sira nia kandidatura ba membru naun permanente neebe iha Nasoens Unidas, sira mos nakloke para atu apoiu ba Timor Leste iha area saida deit mak Timor Leste iha. Embaixador nia mandatu too tinan 2 ka 3, depende ba politika Alemanha, se iha indonezia tinan 3, bele mos iha TL tinan 3 ou bele tinan 2.
Prezidente Republika (PR) Jose Ramos Horta husu Embaixador Alemanha bele vizita beibeik mai Timor Leste, nunee serbisu hamutuk hodi identifika area kooperasaun neebe mak iha hodi serbisu hamutuk no halo relasaun diak ho povu Timor no povu Alemanha, nunee mos Governu Timor no Governu Alemanha. Embaixador Ralf Beste maka diplomata ida neebe iha esperiensia neebe lori mai nia kargu kareira notavel ida, neebe kombina jornalizmu, servisu publiku no lideransa diplomatika. Antes nee, nia serbisu nuudar korespondente ba publikasaun prinsipal sira iha Alemanha, inklui Ruhr Nachrichten no Berliner Zeitung, no pasa tinan 13 nuudar korespondente ba revista Der Spiegel iha Berlin. Iha nia tranzisaun ba funsaun publika, nia desempenha funsaun nuudar porta-vos ba Ministeriu Finansas Rhineland-Palatinate nian.
Embaixador Beste mos kaer kargu altu nível iha Ministeriu Negosiu Estranjeiru Republika Federal Alemana nian, iha Berlin, inklui Diretor Komunikasaun Estratejiku no Xefe Ekipa Planeamentu Polítiku nian. Nia halao knaar nuudar Embaixador Alemanha nian ba Republika Austria hahu hosi tinan 2019, molok nia halao nia knaar foin lalais nee nuudar Diretor Jeral ba Kultura no Sosiedade iha Ministeriu Negosiu Estranjeiru Republika Federal Alemanha nian.
“Parseria neebe evolui entre Timor-Leste no Alemanha, neebe foka liu ba hakbiit ita-nia povu sira liu husi abilidade no oportunidade, loke kapítulu foun ida neebe promisor. Hau iha konfiansa katak iha Embaixador Beste nia lideransa, ita nia kooperasaun sei klean liu tan, hodi lori benefísiu mutual ba ita nia nasaun sira,” afirma Prezidente Ramos Horta.
Timor Leste no Alemanha estabelese relasaun diplomatiku iha loron 20 maiu 2002. Durante dekada rua resin, Alemanha sai hanesan parseiru fundamental ida, fo apoiu ba dezenvolvimentu Timor Leste nian liu husi kooperasaun bilateral neebe signifikativa iha area sira hanesan konsolidasaun dame, dezenvolvimentu rural, empregu juventude no infraestrutura, inklui fornesimentu ro-ahi “Berlin-Nakroma”. Tuir konkluzaun hisi kooperasaun dezenvolvimentu bilateral iha 2023, parseria nee evolui ona ho dinamiku. Vizita Estadu istorika ida hosi Prezidente Ramos Horta ba Alemanha iha Junhu 2023, konsolida tiha ona, foku foun ida kona-ba mobilidade laboral no kapasitasaun, ho Alemanha konkorda atu simu traballador Timoroan sira no apoia inisiativa formasaun profisional nian.
Prezidente Ramos-Horta manifesta nia konfiansa katak Embaixador Ralf Beste nia esperiensia neebe klean, sei kontribui makaas hodi aprofunda relasaun bilateral entre Timor Leste no Alemanha.
(eme)
