DILI, STLTIMORLESTE.com – Prezidente Republika (PR), Jose Ramos Horta simu karta kredensia husi Embaixador Japaun mai Timor Leste (TL), Yamamoto Yasushi, iha Palasiu Prezidensial.
Bainhira remata entrega karta kredensial, Ministru Negosiu Estranjeiru no koperasaun MNEK, Bendito Freitas ba jornalista sira iha Palasiu Prezidensial Nicolau Lobato, Bairo Pite Sesta (09/01/2026) hatete, ohin Yamamoto Yasushi mai entrega karta kredensia hodi troka Embaixador sesante Tetsuya Kimura neebe remata ona nia mandatu iha Timor Leste.
“Ohin dia 9 Janeiru 2026 iha Palasiu Prezidensial ami mai akompanha novu embaixador husi Governu Japaun neebe senhor Yamamoto Yasushi mai troka embaixador anterior Teysuya Kimura neebe misaun hotu ona fila, nunee embaixador foun mai entrega kredensial ba ita nia prezidente Republika,” dehan Ministru.
Membru Governu new dehan, Timor Leste iha relasaun diak tebes ho nasaun Japaun iha setor oin-oin, tanba nee ho embaixador foun bele hametin liu tan lasu amizade entre nasaun rua iha futuru.
“Ita hatene katak Timor Leste iha relasaun diak, importante tebes istoriku ho Governu Japaun, ita hatene katak kooperasaun ida neebe ke ben fundamental iha area setor hotu-hotu ba ita nia dezenvolvimentu establidade no dezenvolvimentu ekonomiku sosias hotu-hotu, tanba nee mak prezensa embaixador foun Yamamoto Yasushi neebe ohin aprezenta kredensial nia sei dezempenha nia papel diak liu tan atu fo kontiniudade ba misaun neebe embaixador anterior husi Japaun halao tiha ona,” katak Ministru.
Xefe Estadu Timor Leste Jose Ramos Horta espresa apoiu total ba misaun embaixador foun, dezafia embaixador foun katak halao misaun diak liu tan.
Bainhira entrega karta kredensial Embaixador Japaun mai Timor Leste, Yamamoto Yasushi hatoo agradese bele simu nia karta kredensial, no Governu Japaun nomeia nia sai nuudar Embaixador foun Japaun mai Timor Leste hodi troka embaixador sesante.
Tuir observasaun neebe STL hetan bainhira remata entrega karta kredensial Prezidente Republika Jose Ramos Horta konvida Embaixador Yamamoto Yasushi hodi halo enkontru kortejia hodi koalia hametin kooperasaun rai rua iha futuru.
Reportajen: Emerenciana Pinto
