DILI, STLTIMORLESTE.com – Prezidente Republika (PR), Jose Ramos Horta simu karta kredendia husi embaixador Foun Republika Korea iha Timor Leste.
Prezidente Republika Jose Ramos Horta simu ofisialmente Karta Kredensia husi CHANG Hayeon, Embaixador Estraordinariu no Plenipotensiariu foun Republika Korea nian iha Timor Leste. Serimonia formal nee halao iha Palasiu Prezidensial Nicolau Lobato.
Bainhira remata entrega karta kredensia, Ministru Negosiu Estranjeiru no Kooperasaun (MNEK), Bendito Freitas ba jornalista iha Palásiu Prezidensia Nicolau Lobato, Bairo Pite Segunda (02/03/2026) hatete, ohin mai akompanha ho Embaixador Korea do Sul mai iha palasiu Prezidensial hodi aprezenta nia karta kredensial ba Xefe Estadu.
“Ohin iha nee ami mai akompanha embaixador foun Korea do Sul mai aprezenta nia karta kredensial ba ita nia Xefe Estadu nee prosesu normal ida bainhira komprementa reprezentasaun dipolimatika pais estranjeiru hotu hotu nunee mos ita nia bai ha neeba sira nia mai iha nee too tempu mandatu remata subtituisaun,” dehan Ministru.
Embaixador hatete, Korea do Sul ho Timor Leste iha relasaun neebe mak diak tebes desde uluk too mai agora tanba nee ho mandatu embaixador foun Korea do Sul bele hametin liu tan koperasaun rai rua.
“Embaixador foun nee mai iha nee halao knaar tuir mandatu neebe atribui ba nia espesialmente ita hatene katak korea do Sul ho Timor Leste iha koperasaun neebe diak tebes iha area oin oin iha area ekonomia, dezenvolvimentu iha imfraestrutura prinsipalmente mobilidade laboral hanesan ita boot sira hatene katak neste momentu ita iha 7 mill trabalhador iha korea do sul sira nia remesas mai Timor nee apoiu ekonomia ba familia mudansa makaas,” dehan Ministru.
Embaixador CHANG Hayeon lori distintu kareira durante dekada tolu iha servisu publiku ba nia knaar foun iha Dili. Graduadu husi Universidade Polísia Nasional Koreanu, nia mos iha Mestradu iha Administrasaun Publika hosi Universidade Yonsei. Nia kareira neebe extensivu inklui lideransa nivel aas iha seguransa publika nuudar Komisariu ba Ajensia Polísia Metropolitana Seoul no Adjuntu Komisariu ba Ajensia Polísia Nasional Koreanu. Nia mos serbisu ona iha papel diplomatiku xave sira, inklui nuudar Asistente Sekretariu iha Gabinete Prezidente nian no tuirmai nuudar Embaixador ba Republika Guatemala. Resipiente ida hosi Orden Meritu Servisu nian (Red Stripes) no Sitasaun Prezidensial oioin, Embaixador Chang kombina esperiensia klean iha seguransa no governasaun ho perísia diplomatika nivel aas.
Dezde estabelesimentu relasaun diplomatika iha tinan 2002, Timor Leste no Republika Koreia dezenvolve ona parseria ida neebe forte no amigavel. Republika Koreia sai nuudar parseiru neebe vital iha Timor Leste nia dezenvolvimentu, fo apoiu signifikativu iha edukasaun, kapasitasaun, no dezenvolvimentu rekursu umanu. Kooperasaun nee kontinua liu husi kontribuisaun ba misaun manutensaun pas ONU nian, interkâmbiu diplomatiku, no programa xave sira hanesan projetu dezenvolvimentu KOICA, Bolsa Estudu Global Korea (GKS), no Sistema Lisensa Empregu (EPS), neebe fornese oportunidade empregu neebe iha valor ba traballador Timor-oan sira iha Korea.
Iha biban nee Prezidente Republika Jose Ramos Horta simu ho laran-kmanek Embaixador CHANG no espresa konfiansa iha ninia abilidade atu haklean liutan lasu entre nasaun rua nee.
“Timor Leste valoriza tebes ninia amizade ho Republika Koreia, parseria ida neebe konsistentemente kontribui ona ba ita-nia dezenvolvimentu nasional,” afirma Prezidente Ramos Horta. “Xefe Estadu fiar katak iha Embaixador CHANG Hayeon nia lideransa sei buka dalan foun ba parseria, partikularmente iha area seguransa no seguransa publika, hodi aproveita ninia esperiensia neebe distintu Prezidente Ramos Horta sublina importansia husi amizade neebe naruk no nota katak Embaixador nia kontbinasaun unika husi nia esperiensia seguransa no diplomatika hanesan rikusoin ida neebe iha valor ba kolaborasaun iha futuru.
Prezidente espresa konfiansa katak Embaixador CHANG Hayeon nia nomeasaun sei eleva no hametin kooperasaun no amizade neebe eziste entre Timor Leste no Republika Koreia, harii iha fundasaun respeitu mutuu no vizaun komun ba pas no prosperidade iha rejiaun nee.
(eme)
