DILI, STLTIMORLESTE.com – Prezidente Republika (PR), Jose Ramos Horta simu karta kredensial husi Embaixador India mai Timor Leste (TL), hodi hametin lasu amizade entre nasaun rua iha futuru.
Lia hirak nee hatoo husi Ministru Negosiu Estranjeiru no Kooperasaun (MNEK), Bendito Freitas ba jornalista sira, bainhira remata akompanha Prezidente Republika, Jose Ramos Horta neebe simu karta kredensial husi Embaixador India mai Timor Leste, iha Palasiu Prezidensial, Nicolau Lobato, Bairo Pite, Dili, Tersa nee (08/04/2025).
Governante nee dehan, ohin iha Prezidensial Aitarak laran, Prezidente Republika simu kredensial husi Embaixador India mai Timor Leste, ofisialmente reprezenta ona xefe misaun diplomatiku India nia mai Timor Leste, ida nee komprimenta ba promesa neebe hatoo husi sua exelensia Primeiru Ministru India nian iha simeira ASEAN iha Jakarta, neebe promete katak sei loke Embaixada India iha Timor Leste.
“Nunee mos ita Timor Leste hahu ona loke ita nia Embaixada iha India ho Senhor Francisco Maukuru, neebe servisu halo instalasaun Embaixada nian, neebe agora prontu, ho ida nee garante diak liu tan ita nia kooperasaun bilateral, reforsa lasu kooperasaun entre TL ho India,” katak MNEK, Bendito.
Ministru nee hatete, India nasaun neebe potensial tebes ba teknolojia ba medisina, farmasiatika ba inovasaun ba agrikultura, ho ida nee mak hanoin importante tebes abertura ofisial Embaixada India iha Timor Leste fo tan konfiansa garantia ba kooperasaun parseria estratejika entre Timor Leste ho India.
“Nee mak ohin lokraik nee Embaixador India hatoo ona karta kredensial, ita nia Prezidente simu ona, espera katak ba oin Prezidente mos promete apoiu masimu ba Embaixador India nia servisu iha TL atu dudu no hatoo mos rezultadu konkretu ba ninia misaun iha TL,” katak governante nee.
(eme)
