DILI, STLTIMORLESTE.com – Prezidente Republika (PR), José Ramos Horta simu kondekorasaun aas iha Guinea Bissau, bainhira partisipa konferensia Xefe Estadu no Governu.
Prezidente Republika, Jose Ramos Horta simu kondekorasaun nasional aas liu Guinea Bissau nian, Medalha Amílcar Cabral, durante serimonia estadu solene ida.
Onra nee konfere liu husi Dekretu Prezidensiál Nu. 20/2025, neebe asina iha loron 14 fulan Julhu husi Prezidente Guinea Bissau, Jeneral Umaro Sissoco Embalo.
Tuir Komunikadu neebe STL asesu husi media Prezidensial Republika Sesta nee (18/07/2025) hatete, kondekorasaun nee rekonese Prezidente Republika Jose Ramos Horta nia papel desizivu iha luta ba autodeterminasaun no independensia povu Timor Leste nian, nunee mos ninia kontribuisaun neebe folin boot hodi konsolida pas, demokrasia no solidariedade entre povu Afrikanu no Luzofonu sira, tuir Amílcar Cabral nia ideal sira.
Serimonia nee halao durante vizita ofisial Laureadu Nobel da Pas nian ba Guinea Bissau, ho objetivu atu hametin lasu amizade, maun-alin no kooperasaun entre nasaun rua nee.
Prezidente Embalo sublina katak vizita nee destaka kualidade elevadu sira husi estadista Timoroan nian no espresa respeitu aas husi povu guiniense ba kontribuisaun Ramos Horta nian hodi hametin relasaun sira entre Guinea Bissau ho Timor Leste.
Medalha Amílcar Cabral estabelese husi Lei numeru 4/73 loron 24 fulan Setembru, reprezenta onra nasional aas liu hosi Guinea Bissau no kondekoradu ho solenidade neebe rezerva ba aktu sira Estadu nian, reflete importansia diplomatiku signifikativu hodi hametin relasaun sira entre nasaun luzófonu rua nee.
(eme)
