DILI, STLTIMORLESTE.com – Prezidente Republika (PR), Jose Ramos Horta simu premiu benevolensia 2025 iha forum mundial ba pas.
Prezidente Republika Jose Ramos Horta simu premiu prestijiadu benevolensia 2025 iha serimonia enseramentu forum mundial ba pas ba dala-9. Premiu nee rekonese ninia kontribuisaun durante vida tomak atu promove pas, dialogu entre sivilizasaun sira no armonia global.
Serimonia nee sublina papel Timor Leste nian neebe boot daudaun nuudar parseiru ativu iha kooperasaun rejional no global.
Tuir komunikadu neebe STL asesu husi media PR, Kinta (13/11/2025) hatete, premiu nee haree nuudar rekonesimentu internasional ba lideransa Prezidente Ramos-Horta nian iha harii ponte entre kultura sira no promove valor universal justisa, inkluzaun no solidariedade nian.
Iha ninia diskursu aseitasaun ho tema ponte entre virtude antigu no inovasaun modernu, Prezidente Ramos Horta espresa ninia gratidaun boot.
Xefe Estadu refleta kona ba virtude antigu ren (benevolensia) no yi (lia-loos), hodi deskreve viajen Timor Leste nian nuudar sasin ba prinsípiu hirak nee.
“Ami aprende tanba nesesidade no konviksaun, katak dalan ba pas neebe loos no duradouru la moris husi vitoria, maibe husi laran-sadia laos husi poder, maibe husi prinsípiu,” afirma nia.
Pontu importante ida husi ninia diskursu mak anunsiu kona-ba dotasaun premiu nian ho valor US$ 100.000. Prezidente Ramos-Horta anunsia katak fundu sira-nee sei kanaliza liu husi Children Future Foundation (Fundasaun Futuru Labarik nian) atu apoia edukasaun, ho fokus espesial ba feto-raan sira.
Prezidente fo apresiasaun uza inovativu dotasaun dijital ida, neebe jere husi Golden Bridge Peace Fund hodi uza teknolojia stablecoin, nuudar ezemplu forte kona-ba oinsa virtude antigu sira bele kombina ho ferramenta modernu atu kria futuru ida neebe justu liu.
Prezidente taka ninia diskursu hodi bolu atensaun ba sidadaun global sira atu habraan kompaixaun nuudar forma aas liu husi realizmu polítiku no ba joven sira atu sai ponte osan-mean neebe konekta matenek no inovasaun atu harii mundu ida neebe benevolente liu.
Jornalista: Emerenciana Pinto
Editora : Domingas Gomes
