DILI, STLTIMORLESTE.com – Prezidente Republika (PR), Jose Ramos Horta simu ofisial Prezidente Senadu no eis Primeiru Ministru (PM) Reinu Kamboja mai Timor Leste.
Tuir konvite husi Prezidente no Laureadu Nobel ba Pas, Jose Ramos Horta, Prezidente Senadu no eis Primeiru Ministru Reinu Kamboja, Samdech Akka Moha Sena Padei Techo HUN SEN, halo vizita ofisial mai Dili husi loron 7 too loron 9 fulan Maiu tinan 2025.
Prezidente Ramos Horta ho laran kmanek hatoo benvindu ba Samdech Akka Moha Sena Padei Techo HUN SEN iha Aeroportu Internasional Nicolau Lobato. Ida nee marka Samdech Techo HUN SEN nia vizita daruak mai Timor Leste, hafoin nia vizita ofisial dahuluk iha tinan 2016 durante nia mandatu nuudar Primeiru Ministru Reinu Kamboja nian.
“Ho laran kmanek hau hatoo benvindu ba Samdech Akka Moha Sena Padei Techo HUN SEN, Prezidente Senadu no eis Primeiru Ministru Reinu Kamboja nian, mai Timor Leste ba vizita istóriku ida nee. Prezensa Samdech Techo HUN SEN iha Timor Leste laos deit simboliza amizade entre ita nia nasaun rua maibe mos loke kapítulu foun iha relasaun entre povu-ho-povu,” afirma Prezidente Ramos Horta iha Palasiu Kinta (08/05/2025).
Prezidente Republika dehan, vizita istoriku ida nee marka etapa signifikativu iha relasaun bilateral entre Timr este no Kamboja, hafoin estabelesimentu Embaixada Kamboja nian iha Dili no aprezentasaun kredensial husi Embaixador CHUN Sovannarith iha loron 29 Abril 2025.
Iha loron 8 fulan Maiu, Prezidente Ramos Horta enkontru bilateral ho Samdech Akka Moha Sena Padei Techo HUN SEN, akompanha husi delegasaun altu nível husi nasaun rua nian, iha Palasiu Prezidensial Nicolau Lobato.
Mais tarde, Samdech Techo HUN SEN sei hatoo diskursu iha Parlamentu Nasional no halao sorumutuk bilateral ho Prezidente Parlamentu Nasional, S.E. Maria Fernanda Lay, no Primeiru Ministru, S.E. Kay Rala Xanana Gusmão.
Iha kalan loron 8 fulan Maiu, Prezidente Ramos Horta sei ofrese bankete ofisial hodi fo onra ba vizita ofisial Samdech Akka Moha Sena Padei Techo HUN SEN nian.
Iha loron 9 fulan Maiu, Prezidente Ramos-Horta sei entrega Honra aas liu Orden Timor Leste nian ba Samdech Techo HUN SEN iha Palestra Prezidensiak 2025 Serie I, neebe sei halao iha Palasiu Prezidensial Nicolau Lobato. Hafoin serimonia nee Samdech Techo HUN SEN sei hatoo diskursu prinsipal ida ho títulu HUN SEN nia Lisaun sira Husi Jenosídiu no Pobreza ba Liberdade no Prosperidade.
Vizita Samdech Akka Moha Sena Padei Techo HUN SEN subliña profundamentu amizade entre Timor Leste no Kamboja no reflete kompromisu komin nasaun rua nian ba kooperasaun no dezenvolvimentu rejional iha kuadru ASEAN nian.
(eme)
