DILI, STLTIMORLESTE.com – Prezidente Republika (PR), Jose Ramos Horta hatete, karik Lider Karismatiku Xanana Gusmão apoiu ema ruma kandidata aan ba Prezidente Republika iha 2027-2032 tenke leal ba Governu neebe lidera husi PM Xanana, laos hamonu Governu.
Prezidente Republika Jose Ramos Horta hatoo kestaun nee ba jornalista sira, bainhira remata Vizita ba Jakarta no fila hikas mai Timor Leste iha Aeroportu Internasional Nicolau Lobato, Komoro, Tersa (24/03/2026).
Iha informasaun katak Prezidente Republika sei kandidata aan dala ida tan ba Prezidente Republika ba periodu 2027-2032 nee los ka lae? Hatan ba kestaun nee Prezidente Republika hatete, desizaun seidauk iha, karik halo buat ruma sei konsulta ho Primeiru Ministru kay Rala Xanana Gusmão.
“Lae, nee desizaun seidauk halo, tanba primeiru hau atu halo buat ruma ba rai ida nee hau konsulta rona Maun Boot Xanana, la signifika ke buat neebe nia hatete hau tuir deit lae, maibe hau konfiansa liu ba nia saida mak nia hakarak hau nia kontribuisaun hau apoia,” dehan PR Horta.
Xefe Estadu hatete, se Primeiru Ministru hakarak kandidata ema foun ruma ba Prezidente Republika, bainhira asumi kargu nuudar Prezidente Republika tenke leal ba PM Xanana no apoiu programa Governu, laos hamonu.
“Maun boot hakarak hili kandidatu ruma foun nee mos diak, hau nia pozisaun uniku mak ida nee, se mak ba Prezidente tenke hatudu lealdade 100% ba Maun Xanana, labele kandidatu aan ba Prezidente ho maun Xanana nia apoiu depois buka fali hamonu Governu maun Xanana nia hanesan dala rua akontese iha kotuk 2012-2017 no 2017-2022 problema boot,” katak PR Horta.
Xefe Estadu hatete, bainhira asumi pasta nuudar Xefe Estadu tenke leal ba Xanana no apoiu planu programa Governu, no segundu Timor Leste membru ASEAN ona liu liu agora kaer Timor Leste lidera Prezidensia CPLP.
“Labele derepente krize boot iha laran tanba prezidente foun nee la kolabora ho Governu, la fo pose ba membru Governu nee mak unika preokupasaun, se kandidatu ruma neebe diak tebes ke apoiu garante sei servisu diak ho Primeiru Ministru, ho Maun boot Xanana nee hau konkorda no prontu ses aan kedas, unika preokupasaun mak ida nee,” katak Prezidente Republika.
Xefe Estadu hatete, se kandidatu Prezidente Republika ba tinan oin kuandu kolabora ho Governu nia programa no lealdade ba Primeiru Ministru Xanana Gusmão, Prezidente Republika Horta prontu ses aan la kandidata aan ba Prezidente.
(eme)
