DILI, STLTIMORLESTE.com – Prezidente Republika (PR), Jose Ramos Horta too ona Abu Dhabi atu partisipa Premiu Zayed ba Fraternidade Umana tinan 2026.
Tuir Komunikadu neebe STL asesu husi media Prezidensia Republika Tersa (03/02/2026) hatete, Prezidente Republika Jose Ramos Horta too iha Aeroportu Internasionsl Abu Dhabi iha tuku 12:45 kalan-boot oras Abu Dhabi, iha loron 3 fulan fevereiru 2026, hodi hahu vizita servisu nivel altu nian ida ba Emiradu Arabe Unidu.
Bainhira too, Laureadu Premiu Nobel ba Dame nee no ninia delegasaun simu husi Embaixador Timor-Leste ba Abu Dhabi.
Vizita nee foka liu ba Prezidente nia partisipasaun iha Premiu Zayed ba Fraternidade Umana 2026, eventu ida neebe iha signifikadu boot ba Timor Leste, tanba iha tinan 2022, nasaun nee sai primeiru iha mundu neebe adota formalmente Dokumentu kona-ba Fraternidade Umana ba ninia valor nasional sira.
Durante misaun loron tolu nee, Prezidente Ramos Horta sei hatoo diskursu prinsipa iha Majlis Fraternidade Umana no sei halo dialogu ho diplomata futuru sira iha Anwar Gargash Diplomatic Academy.
Pontu importante husi vizita nee mak sorumutu kortizia ho sira nia Maun Boot Sheikh Mohamed bin Zayed Al Nahyan, Prezidente UAE, no partisipasaun iha serimonia premiu iha Founder’s Memorial.
Molok fila iha loron 5 Fevereiru, Prezidente mos sei partisipa iha Cimeira Mundial Governu sira nian iha Dubai, hodi hametin liutan relasaun bilateral no reforsa Timor Leste nia kompromisu ba dame internasional no dialogu umanitariu.
(eme)
