DAVOS, STLTIMORLESTE.com – Prezidente Republika (PR), Jose Ramos Horta ho ekipa too ona iha Aeroportu Suisa hodi partisipa enkontru anual Forum Ekonomiku Mundial (World Economic Forum) 2026.
Prezidente Republika too iha Zurich, Suisa, Kuarta (21/01/2026) tuku 09.00 dader oras lokal. Prezidente Republika ho ekipa too iha Aeroportu Suisa simu direita husi Embaixador Timor Leste iha Suisa, António da Conceição, no tun husi aviaun Prezidente halao viajen kedas ba Davos.
Prezidente Republika Jose Ramos Horta, vizita privadu trabalhu ba Davos, Suisa, husi loron 20 too 23 janeiru 2026, hodi partisipa Enkontru World Economic Forum.
Forum tinan ida nee ho tema “Espíritu Dialogu nian” konvoka líder global sira husi Governu, empreendedor no sosiedade sivíl hodi partilla dezafiu jeopolítiku, ekonomiku no ambientál sira neebe urjente.
Prezidente Ramos Horta nia partisipasaun sublina Timor Leste nia kompromisu ba envolvimentu multilateral neebe konstrutivu no ninia papel proativu hodi fornese solusaun kolaborativa sira.
Durante vizita, Prezidente nia kompromisu sira sei foka ba tema krítiku sira relasiona ho dame, kreximentu inkluzivu no rejenerasaun ambiental.
Iha loron 21 Janeiru, Presidente Ramos-Horta partisipa iha dialogu estratejiku nivel aas nian, inklui Enkontru Informal ida hosi Líder Ekonomiku Mundial sira (IGWEL) kona-ba Restaura Espíritu Dialogu iha Mundu neebe fahe malu no dialogu ho parte interesada sira ho títulu “Tau Empreendedor sira iha Fatin neebe Merkadu Laiha”. Presidente mos sei tuir sesaun ida neebe organiza hosi Global Citizen no Forbes.
Iha loron 22 janeiru, Prezidente Ramos Horta hatoo diskursu prinsipal iha eventu paralelu importante rua. Primeiru, Plástiku Neutral Global Transforma Poluisaun ba Serbisu no Infraestrutura, sei ezamina hodi transforma krize poluisaun plastiku ba oportunidade ida ba empregu verde no infraestrutura sustentavel. Segundu, Empregu Rejenerativu Millaun 100 Rekonstrui Ekonomia Lokal sira dezde Baze liu hosi Sistema Ai-han, Turizmu, no Asistensia, sei destaka modelu rejenerativu sira hanesan dalan sira ba restaurasaun ekolojia no ekonomia komunitaria sira neebe reziliente.
Itinerariu Prezidente nian inklui mos serie enkontru bilateral ho figura xave internasional sira no prezensa iha Jantar Sidadaun Global. Prezidente Ramos Horta afirma, iha mundu ida neebe dalabarak nakfera tanba konflitu no deskonfiansa.
“Espíritu Diologu laos deit tema ida maibe nesesidade ida. Timor Leste nia jornada rasik hanorin ita katak pas no prosperidade neebe metin harii liuhosi konversa persistente no respeitoza no kompromisu kompartilhadu ho benkomun. Iha Davos, hau sei lori ita-nia povu nia lian, advokasia ba kooperasaun global neebe investe iha dame, fo kbiit ba empreendedor sira, no proteje ita-nia planeta ba jerasaun sira iha futuru.” dehan Prezidente Republika.
Prezidente nia partisipasaun iha Forum Ekonomiku Mundial reafirma Timor-Leste nia papel ativu iha dialogu internasional no ninia dedikasaun ba parseria hodi buka solusaun ba asuntu global sira.
(eme)
