DILI, STLTIMORLESTE.com – Prezidente Repúblika (PR), José Ramos Horta halo vizita ba iha edifisiu tuan Tribunal Distrital Dili (TDD), neebe iha futuru sei sai edifísiu provizoriu Tribunal Supremu Justisa Timor Leste.
Prezidente Republika, José Ramos Horta iha Kuarta nee (01/10/3025), halo vizita ba iha edifísiu tuan Tribunal Distrital Dili, hodi avalia kondisaun ho objetivu atu prepara ba futuru edifísiu provizoriu Tribunal Supremu Justisa TL nian.
Durante vizita, Xefe Estadu nee dehan, governu presiza tau atensaun imediata ba antigu edifísiu TDD, nunee bele realiza lalais instalasaun Tribunal Supremu molok tama iha tinan 2026 nia rohan.
“Hau mai observa deit, laos Prezidente Republika nia kompetensia ba prosesu sira, nee totalmente Ministeriu Justisa nian hodi haree ba infraestrutura setor justisa,’’ dehan Prezidente Ramos-Horta.
Xefe Estadu nee katak, kona-ba preparasaun sira no nia tarefa servisu ba instalasaun, nee Tribunal Supremu instaladu ona entre Maiu no Novembru 2026, tanba tinan 2027 no 2028 nee sei tama ba eleisaun Prezidensiál no Parlamentar.
Prezidente manifesta ninia konfiansa katak Governu atual hamutuk ho instituisaun judisiariu sira, sei halo preparasaun diak, profesional no tuir nia tempu ba instalasaun Tribunal Supremu TL nian.
Iha vizita nee akompanha husi Prezidente Tribunal Rekursu, Afonso Carmona hamutuk ho funsionariu sira husi tribunal nian.
Jornalista: Emerenciana Pinto
Editora: Domingas Gomes
