DILI, STLTIMORLESTE.com – Prezidente Republika (PR), José Ramos Horta vizita privadu ba Malazia no vizita trabalhu ba Monaku.
Iha loron Tersa nee (17/06/2025) Prezidente Republika José Ramos Horta hahu vizita privadu ba Malazia husi 17 too 22 fulan Junhu no vizita trabalhu ba Monaku husi 23 too 25 fulan Junhu 2025, hodi hametin Timor Leste nia parseria internasionsl sira no avansa kooperasaun rejional.
Prezidente Ramos Horta nia vizita ba Kuala Lumpur foka liu ba aprofunda relasaun bilateral sira ho Malazia, parseiru xave ASEAN no apoiante ba tempu naruk Timor Leste nian. Programa komprensivu inklui partisipasaun iha lansamentu livru Primeiru Ministru Anwar Ibrahim nian iha Salaun Tunku Abdul Rahman, demonstra relasaun bilateral forte entre nasaun rua.
Prezidente mos sei envolve ho Universidade Taylor liu husi eventu akademiku espesial ida no almosu VIP, destaka oportunidade kooperasaun edukasional ba estudante Timoroan sira no esplora parseiru iha edukasaun superior.
Vizita ida nee reforsa ligasaun istóriku entre Timor Leste ho Malazia, harii iha Malazia nia apoiu krusial durante Timor Leste nia dalan ba independensia no parseria kontinua iha inisiativa dezenvolvimentu rejional sira.
Prezidente nia vizita trabalhu ba Monaku hahu husi loron 23 too 25 fulan Junhu sublina diplomasia multilateral no envolvimentu juventude liu husi atividade xave balu.
Prezidente Ramos Horta sei halo enkontru ofisial ho autoridade Monegasku sira no partisipa iha kompromisu diplomwtiku sira ho nível aas. Pontu importante mak sesaun interativu ho estudante internasional liu 40, promove dialogu kona-ba asuntu global no fahe esperiensia dezenvolvimentu uniku Timor Leste nian.
Programa nee inklui almosu ho nivel aas ho distintu konvidadu nain 20 no partisipa iha atividade sira husi Fundasaun Prínsepe Alberto II neebe foka ba sustentabilidade ambiental no asaun klimatika.
Prezidente Ramos Horta komenta kona-ba importansia husi vizita sira nee “Malázia sai hanesan belun ida-neebe metin mai Timor Leste dezde ita-nia luta ba independensia, no hametin ita nia parseria iha família ASEAN nia laran. Iha Monaku, ita envolve ho komunidade internasional boot liu, hodi fahe ita nia nasaun nia viajen enkuantu aprende husi pratika diak sira iha mundu. Vizita sira-nee hatudu ita nia kompromisu ba diplomasia ativa neebe serve ita-nia povu nia aspirasaun ba dezenvolvimentu, edukasaun, no prosperidade sustentavel.” katak PR Horta.
Vizita sira nee mos sublina Prezidente Ramos-Horta nia esforsu kontinua atu diversifika parseria internasional Timor Leste nian no asesu oportunidade foun iha edukasaun, kuidadu saude, no dezenvolvimentu sustentavel.
Prezidente Ramos Horta tuir planu sei fila hikas mai Timor Leste iha loron 27 fulan-juñu tinan 2025.
(eme)
