DILI, STLTIMORLESTE.com – Prezidente Republika (PR), Jose Ramos Horta vizita Tribunal Rekursu hodi haree direita kondisaun no hatudu solidariedade no simpatia.
Bainhira remata vizita, Prezidente Republika Jose Ramos Horta ba jornalista sira iha Tribunal Rekursu, Sesta (16/05/2025) hatete, nia vizita ba Tribunal Rekursu hodi haree direita kondisaun.
“Hau mai iha nee para hatudu deit solidariedade simpatia ba sistema judisaria ba Prezidente Tribunal Rekursu foun agradese mos ba kolega sira juis hotu-hotu neebe kontinua servisu nuudar juiz Konselheiru iha Tribunal Rekursu para transmite mos ba sira nuudar prezidente,” katak PR Horta.
Prezidente Republika hatete, nuudar Prezidente nia kbiit mak atu aselera instalasaun Tribunal Supremu Timor Leste.
Prezidente Republika bele hatete deit nia vontade politika dudu ba instalasaun nee sei liu husi kalendariu ida neebe sei aprovadu husi partisipante lubuk ida, husi Parlamentu sei rona selu superior majistratura no seluk tan ho juiz sira iha Tribunal Rekursu.
“Hau hakarak halo buat nee partisipativu tenke hatuur importansia hotu-hotu tanba sira hotu-hotu koalia tanba tribunal supremu nee laos fasil tantu foin mak loke foin atu hahu atu halo tenke halo diak duni 100%,” katak PR Horta.
Prezidente Republika dehan, labele demora liu tan tanba Timor Leste indepedensia 23 anos ona,
Iha biban nee Prezidente Tribunal Rekursu Afonso Carmona hatoo agradese ba Prezidente Republika Jose Ramos Horta neebe vizita Tribunal Rekursu hodi haree direita kondisaun.
“Hau hakarak fo agradesimentu boot ba Exselensia Prezidente tanba presiza tempu atu vizita no fo apoiu mai Tribunal, liu-liu ba ideia importante ida, mak ideia atu kria Tribunal Supremu iha Timor Leste,” katak PTR.
PTR dehan, apoiu nee mak sinal forte katak lideransa nasional iha vizaun klaru atu hametin sistema judisiariu neebe independente, livre no servisu ba justisa. Ideia atu kria Supremu Tribunal ba Justisa laos deit planeamentu legal, maibe mak parte integral husi ninia konstitusional atu halo justisa real iha moris povu.
“Hau kompriende katak iha tempu oin ba realizasaun ideia kriasaun supremu Tribunal ba Justisa nee iha dezafiu barak neebe tenke rezolve liga ba lejislasaun, mak lejislasaun balun liga ba Juiz Konselheiru sira iha STJ, kona-ba artigu 30° LOJ no lei konabá EMJ nia artigu 63, n. 1, al. a), Lejislasaun balun liga ba Juiz Dezembargador sira iha TR, konaba artigu 30° LOJ no lei konabá EMJ nia artigu 63, n. 1, al. a), Lejislasaun balun liga ba promosaun juiz sira sira iha, lei konabá LEMJ nia artigu 56, Lejislasaun balun liga ba Juri ba konkursu juiz sira iha TR no STJ, lei konabá EMJ nia artigu 61 no 65. Lejislasaun balun liga ba membru konselhu juiz sira nian, iha lei konaba EMJ nia artigu 165, n. 2 al. d) e 167. Lejislasaun balun liga ba sesasaun ba funsaun juiz sira, iha lei konaba EMJ nia artigu 72. Lejislasaun balun liga ba remuneratoriu juiz sira nian, konaba salariu Juiz konselleiru sira iha STJ, Juiz dezembargador sira iha TR. Lejislasaun balun liga ba ofisial justisa sira no auditoriu sira nia neebe iha afeta ba.
PTR dehan, liga ba lejisasaun sira temi nee bele ajuda hodi fasiltar prosesu rekrutamentu ba juiz sira hodi bele preenxe iha Tribunal Rekursu no Suprema Trubunal ba Justisa no konaba edifisiu supremu ba justisa nia dezenu lao hela no nia fundu hafoin dezenu maka sei halo kontajen.
Tuir observasaun neebe mak STL hetan iha vizita nee Prezidente Republika Jose Ramos Horta mos entrega ekipamentus eletronika ba Prezidente Tribunal Rekursu Afonso Carmona hodi nunee bele halao servisu.
(eme)
