DILI, STLTIMORLESTE.com – Prezidente Republika (PR), Jose Ramos Horta dezafia ka husu ba graduadu sira kaer metin disiplina no hili area siensia ba dezenvolvimentu nasional.
Prezidente Republika, Jose Ramos Horta hatoo kestaun nee liu husi diskursu bainhira partisipa serimonia graduasaun husi eskola ensinu sekundaria Internasional St Judas Thaddeus Internasional School, iha salaun Auditoria Kuartel Jeral F-FDTL, Fatuhada, Kuarta (17/12/2025).
Iha biban nee Prezidente Republika hatoo mensajen ida neebe makaas maibe inspiradora kona-ba nesesidade disiplina no pontualidade ba susesu profisional.
Xefe Estadu sublina katak pontualidade mak hahalok lideransa nian neebe labele negoseia, hodi temi ninia polítika rasik neebe estritu kona-ba kansela reuniaun ho sira neebe too tarde.
Prezidente husu ba estudante sira atu fo prioridade ba edukasaun iha area praktika sira, espesifikamente husu atu muda husi kursu sira neebe nakonu ona hanesan Relasaun Internasional hodi hili fali “siensia ezata” (hard sciences), teknolojia, dijitalizasaun, no enjenaria, neebe esensial ba progresu nasaun nian.
“Hodi destaka lakuna krítiku sira iha dezenvolvimentu Timor Leste nian, Prezidente fo avizu makaas kona-ba seguransa bee no profisiensia forsa serbisu nasaun nian, no nota katak avaliasaun sira iha pasadu hatudu defisiensia signifikativa iha matematika bazika iha funsaun publika laran, no lamenta kona-ba falta infraestrutura kaptasaun bee-udan iha nasaun nee,” dehan PR Horta.
Prezidente Republika Ramos Horta dezafia foin-sae sira atu sai peritu iha jestaun bee no seguransa ai-haan, hodi fo avizu katak se la iha inovasaun no kuidadu seriu ba rekursu natural sira, nasaun sei hasoru futuru neebe kuran (scarcity).
Iha konkluzaun, Prezidente elojia komunidade filipina ba sira-nia kontribuisaun naruk ba edukasaun iha Timor-Leste. Xefe Estadu husu ba graduadu sira atu haree ba legadu veteranu FALINTIL nian nuudar ezemplu aas liu ba reziliensia, sakrifísiu no dixiplina.
Hodi hanoin hetan katak Ramos Horta entrega tiha ona ninia medalla Premiu Nobel da Paz ba ezersitu gerilla nian iha tinan 2000 nuudar omenajen ba sira-nia rezistensia, nia husu ba estudante sira atu onra istoria nee hodi esforsa an atu sai diak liu iha sira-nia area no servi sira-nia família no nasaun ho dedikasaun no sentidu responsabilidade.
Jornalista: Emerenciana Pinto
Editora: Carme Ximenes
