DILI, STLTIMORLESTE.com – Parlamentu Nasional (PN) liu husi Bankada FRETILIN, Deputadu Joaquim dos Santos deklara, Prezidente Republika (PR) iha direitu atu defende vendedores ambulante sira, wainhira hetan agresaun fiziku husi Sekretariu Estadu Asuntu Toponomia no Organizasaun Urbana (SEATOU) ho ekipa.
Kestaun nee Deputadu Joaquim dos Santos deklara relasiona ho Prezidente Republika (PR) neebe kestiona atuasaun SEATOU ho ekipa, halo agresaun fiziku hasoru vendedores ambulante sira iha kampung Baru, Komoro foin lalais nee.
“Prezidente Republika iha razaun tanba nia hanesan orgaun Unipesoal atu garante direitu sidadania, tanba nee wainhira membru governu ida ezerse nia funsaun mak hamosu violasaun direitu fundamental sidadaun sira nian, mak Prezidente Republika iha obrigasaun atu defende povu,” hatete Joaquim dos Santos ba Jornalista sira,iha resintu Parlamentu Nasional, Díli, Kuarta (30/10/2024).
Maibe nia dehan, governu tenki rona Prezidente Republika relasiona ho atuasaun SEATOU hasoru vendedores ambulante sira.
Tanba governu atu muda negosiante Ambulante sira mak tenki kria uluk kondisaun iha merkadu Taibesi no Manleuana, nunee muda vendedores sira ba karik iha ona kondisoens ruma.
“Hau nia opiniaun hanesan reprezentante povu kualker desizoens neebe ita atu foti tenki bazeia ba lei. Ita la kontra dezenvolvimentu iha atu lao, maibe iha prosesu atu ezekuta desizaun tenki bazeia ba lei,” esplika nia.
(alb)
