DILI, STLTIMORLESTE.com – Visi Primeiru Ministru, Mariano Assanami Sabino hatete, Prezidente Republika (PR) Jose Ramos Horta iha vizaun boot atu promove Turizmu Nasional, tanba nee ohin sira mai halao brifing ho Xefe Estadu.
“Ohin enkontru ho Prezidente Republika atu fo brifing ba Prezidente Republika liu-liu atividade neebe aban, hanesan ita hotu hatene katak ho vizaun Prezidente Republika nia promove Turizmu Nasional ita nia komponente 4, espozisaun ida mak siensia no teknolojia neebe lidera husi Ministru Ensinu Superior, neebe halo ona konferensia internasional neebe laureadu Nobel sira mai hanesan koalia iha fulan Agostu, sei fo kontinua aban 15 Novembru sei iha atividade boot halo iha nee,” katak Visi PM, Assanami ba jornalista sira iha Palasiu Prezidensial, Nicolau Lobato, Bairo Pite, Dili, Kinta (14/11/2024).
Governante nee dehan, espozisaun siensia no teknolojia sei halao loron rua, hahu husi loron sesta no Sabadu, tanba nee husu ba Komunidade, estudante no intelektual sira atu partisipa iha Palasiu Prezidente.
“Depois komponente seluk mak ita mos sei halo atividade desportu neebe mak sei halo iha loron 16 hahu tuku 6 dader, dalan sei taka, ita hotu sei mai konsetra iha nee, halao Dili Maratona no ema internasional barak mos mai tuir husi Indonezia no seluk tan, husu mos ba joven sira no ba atleta sira para bele partisipa, no sei iha mos Taekwondo sei halao iha 26 too 27 neebe mak ita sei halo, husu ba atleta sira no sei loke mos ba atleta internasional sira sei mai hola parte, no Boksista nee mos sei nakloke, importante tebes sei iha ema internasional mos tuir,” hatete governante nee.
Nia hatutan, komponente 4 nee iha hotu oinsa mak promove Turizmu Nasional neebe mai husi Vizaun Prezidente Republika nian rasik.
(eme)
