DILI, STLTIMORLESTE.com – Prezidente Republika (PR), Jose Ramos Horta inaugura mini Zoo, inisiativa ida neebe dezena atu serve nuudar sentru nasional ba edukasaun ambiental, rekreasaun família nian no konservasaun animal fuik sira.
Mini-Zoo harii ho objetivu prinsipal atu fornese esperiensia direta, interativu ho animal sira, hakat liu observasaun tradisional hodi haburas ligasaun ida neebe klean liu, signifikativu liu entre publiku no mundu natural.
Bainhira remata halo abertura, Asesor Sosiedade Sivil Prezidensia Republika, Quintiliano Moniz ba jornalista sira, ha Palasiu Prezidensial, Nicolau Lobato, Bairru Pite, Dili, Segunda (22/09/2025) hatete, ohin Prezidente Republika, Jose Ramos Horta inagura Mini Zoo iha palasiu Prezidensia.
“Atividade ida ohin nee ita halo serimonia ida inagura mini Zoo neebe mak neebe mak inisia husi ita nia nain Prezidente, iha nee iha mini Zoo ita rekoila animal neebe maki ha ita nia rai laran lokal nomos iha rai liur balu mai iha mini Zoo,” katak Asesor nee.
Asesor nee dehan, animal iha Mini Zoo nee neebe mak importa husi rai liur mak kuda badak ho manu marakin dia, Loriku, ho kuda boot nee oferese husi Governador Kupang restu nee manu iha rai laran hotu.
Iha biban nee Prezidente Republika, Jose Ramos Horta liu husi diskursu hatoo bemvindu ba partisipante hotu, neebe partisipa iha lansamentu Mini Zoo iha Palasiu Prezidensial, Nicolau Lobato.
Aleunde nee Títulu Lansamentu Mini-Zoo Palasiu Prezidensial Sentru foun ida ba Edukasaun, Rekreasaun no Konservasaun.
Projetu ida nee harii ho vizaun inportante maka atu sai nuudar sentru ida ba edukasaun, rekreasaun, no konservasaun, ho prioridade ba interasaun direta ho animal sira, Objetivu baziku tolu Primeiru, Edukasaun. Mini-Zoo nee sei fo komprensaun klean liu kona-ba espesie animal oioin, liuliu animal domestiku no animal fuik lokal neebe la haree beibeik. Nee sei oferese oportunidade uniku ba vizitante sira, espesialmente ba labarik sira, atu aprende kona-ba bem-estar animal nian, haburas komprensaun boot liu kona-ba mundu ka ambiente natureza nian, hosi idade kiik. Buat neebe importante liu mak, mini zoo nee sei hanorin valor baziku hanesan empatia, kuidadu, no domin ba natureza no animal sira.
Segundu, Rekreasaun no Turizmu. Inisiativa ida nee sei fornese destinu turístiku ida neebe amigavel ba família, eskapamentu pasífiku ida hosi barullu no konjestaun iha area urbana. Ida-nee sei oferese esperiensia interativu sira neebe maka liu fali haree vídeo sira ka haree ba imajen sira, hanesan fo-han no maneja animal sira ho supervizaun, neebe mos bele ajuda labarik sira atu ultrapasa tauk sira.
Terseiru, Konservasaun, Mini-Zoo sei funsiona hanesan forma ida konservasaun ex-situ nian, hodi adere ba prinsípiu forte sira bem-estar animal nian iha ninia kuidadu no jestaun ba tempu naruk. Ida nee maka instrumentu ida neebe importante tebes atu hasae konxiensia publiku nian kona-ba importansia natureza nian no konservasaun ba animal fuik nativa sira.
Projetu ida-nee reprezenta kompromisu ida atu harii sosiedade ida neebe edukadu no empatiku liu, bazeia ba domin nasaun nia patrimoniu natural neebe riku.
Jornalista: Emerenciana Pinto
Editora:Carme Ximenes
