DILI, STLTIMORLESTE.com – Prezdente Republika (PR), Jose Ramos Horta deside kansela viajen ba nasaun Abu Dhabi, tanba kondisaun saude mak la permite.
Prezidente Republika Jose Ramos Horta hatoo kestaun nee ba jornalista sira iha kantina Matak Palasiu Prezidensial Nicolao Lobato, Bairo Pite, Tersa (11/01/2025 ).
PR hatete, nia deside kansela viajen ba nasaun Abu Dhabi nomos Alemanha tanba moras.
“Razaun kansela viajen tanba hau ba Abu Dhabi hau hetan gripe, moras oituan, diak ona oituan maibe so ba fali, laos deit Abu Dhabi, depois liu tan ba Alemanha ba konferensia. Maibe tanba Visi Primeiru Ministru Kalbuadi Lay nia mos ba, tanba nee tema ba reuniaun agora iha Abu Dhabi nee liu-liu ba governu nian, entaun hau mos koalia ho Visi Primeiru Ministru, nia konfirma nia ba, entaun hau kontente hau la ba,” dehan Prezidente Republika.
Prezidente Republika hatete, ba nasaun Alemanha, Xefe Estadu mak kansela, no Prezidente rasik hatoo ona ba nasaun Alemanha katak, nia la marka prezensa tanba kondisaun mak la permite.
“Ba Alemanha hau kansela deit, hau hatete deit ba sira hau laiha kondisaun atu ba. Hau la sai too 20 Fevereiru, hau tenke ba Vietname, ba forum ASEAN nian, mas pur enkuantu hau iha nee hau sei ba vizita boot ida iha loron 20 iha Same ho Embaixador sira lubuk, total ema atus ida resin ba vizita Same, hau aproveita ba pasiar iha rai laran,” katak PR Horta.
Prezidente dehan, nia aproveita ba pasiar iha rai laran, hanesan ba Vizita Komunidade iha Atsabe, Baukau, Lospalos.
Tuir informasaun neebe STL hetan, Prezidente Republika viajen bai ba Abu Dhabi iha semana ida nee nia laran, maibe tanba saude la permite kansela viajen ba nasaun rua hanesan Abu Dhabi nomos Alemanha.
(eme)
