AMBENO, STLTIMORLESTE.com – Prezidente Republika (PR) kompromete atu konstrui uma foun ida ba joven defisiensia ho naran Lucia Falo, iha Suku Taiboko, Postu Administrativu Pantemakasar, Rejiaun Administrativa Espesial Oecusse-Ambeno (RAEOA).
Joven Defisiensia nee deskobre husi Assesoria Asuntu Sosial RAEOA ho Xefe Suku Taiboko, nunee iha loron sesta lokraik, Unidade Servisu Apoiu Sosial (SSAS) husi Prezidensia Republika, lidera husi asesor Quintiliano Moniz Carvalho, vizita Lucia no nia aman. Husi vizita nee, nia promete sei koordena ho Autoridade Lokal atu halo uma mahon ida ba familia no trata dokumentu legal defisiensia Lucia Falo nian.
“Imi haree kondisaun nee, Uma sei halo, maibe laos deit ba nia mesak, tanba aban bainrua nia presiza ambiente seguru atu moris hanesan ema hotu,” dehan Quintiliano.
Lucia Falo ho idade 20, husi aldeia Makela, suku Taiboko, postu Pante Makasar, Oecusse, moris iha kondisaun susar, tanba defisiensia mental no falta apoiu sosial. Durante tinan barak, Lucia hela deit iha baraka kiik, taka ho tali tahan, neebe la garante seguransa, liu-liu bainhira tempu udan ka anin boot.
Familia dehan, kondisaun real nee aumenta depois nia inan mate no nia aman Domingos Falo, mos defisiensia fiziku, la iha kapasidade atu sustenta. Nunee familia husu ba MSSI no estadu atu fo atenksaun urgente.
“Ami taa tali-tahan halo uma oan ida ba nia, maibe diak liu, se bele estadu halo uma foun seguru ba nia,” dehan familia defisiensia mental, Francisca Punef.
Parte relevante sira hanesan Institutu Nasional Seguransa Sosial (INSS) no Ministeriu Solidariedade Sosial no Inkluzaun (MSSI) seidauk fornese subsidiu defisiensia ka sasan ajuda ida ba Lucia. Dokumentu identifikasaun mos seidauk kompletu, tanba prosesu administrativu lakon.
Durante vizita, ekipa Prezidensia mos fahe nesesidade bazika hanesan mina, fos, manu tolun no osan.
Jornalista: Joseph Koa
Editor: Joseph Koa
