DILI, STLTIMORLESTE.com – Prezidente Republika (PR), José Ramos Horta Kondekora Lideres Polisia Internasional ho Grau Insignia Ordem Timor Leste.
Loron espesial ba Polisia Nasional Timor Leste (PNTL) Kinta nee (27/03/2025) Prezidente Republkka José Ramos Horta kondekora Grau Insígnia Orden Timor Leste ba distintu lideres polisia nain tolu husi Indonezia, Portugal no Australia. Kondekorasaun nee fo sai liu husi dekretu prezidensial neebe asina iha loron 18 fulan Marsu tinan 2025.
Primeiru Ministru, Kay Rala Xanana Gusmão aprezenta Grau Insígnia Orden Timor Leste iha Selebrasaun Aniversariu PNTL nian ba dala 25, iha Governu Palasiu.
Lideres polisia neebe kondekoradu mak Jenerál Listyo Sigit Prabowo (Indonezia), Xefe Polisia Nasional Indonezia dezde Janeiru 2021, Jeneral Prabowo harii ona kareira ida neebe foka ba polisia profisional no transformasaun dijital. Nia okupa ona pozisaun lideransa xave sira iha investigasaun kriminal no planeamentu estratejiku, servisu hodi hasae integridade Polisia Nasional Indonezia nian.
Tenente Jenerál Rui Alberto Ribeiro Veloso (Portugal) Promove ba Komandante Xefe Guarda Nasional Republikana nian iha Agostu 2023, Veloso lori espériensia boot iha seguransa interna, fenomenu kriminal no jestaun krize. Nia serví ona iha unidade operasional oin-oin no rekonhesidu nuudar peritu iha operasaun militar no seguransa nian.
Komisariu Reece Kershaw (Austrália) Ho esperiensia liu dekada tolu iha servisu polisia nian, Kershaw hetan ona nomeasaun nuudar Komisariu Polisia Federal Australia nian ba dala 8 iha fulan Outubru 2019. Ninia kareira abranje funsaun oin-oin iha investigasaun kriminal no krimi organizadu grave, inklui destakamentu internasional sira ba Timor Leste, Olanda no Ilha Salomaun.
Prezidente Ramos Horta sublina importansia husi kooperasaun internasional, “Servisu sira neebe presta husi ita nia belun estranjeiru sira iha kontestu relasaun interestadu nian nee importante tebes. Sira nia esforsu laos deit promove amizade entre povu sira, maibe mos kontribui signifikativamente ba pas, estabilidade nasional no dezenvolvimentu Timor Leste nian,” Katak PR Horta.
Dekretu Prezidente Republika rekonhese apoiu no kontribuisaun substansial husi lideres sira mai Timor Leste, reflete kompromisu nasaun nian ba parseria internasional no komprensaun ba malu.
(eme)
