DILI, STLTIMORLESTE.com – Prezidente Republika (PR), Jose Ramos Horta kondekora Medalha Meritu ba Brigada Medika Xina nain 12 ba sira nia kontribuisaun iha setor saude Timor Leste.
Iha loron Tersa (14/10/2025) Prezidente Republika Jose Ramos Horta kondekora Medalla Meritu no Diploma Rekonesimentu ba Brigada Medika Xines nain 12 ba sira nia kontribuisaun iha Setor Saude Timor Leste nian.
Rekonhesimentu ida nee hakerek iha akordu kooperasaun ida entre Republika Demokratika Timor Leste no Republika Popular Xina. dezde Governu Konstitusional Timor Leste dahuluk, Governu Xina fo apoiu ba setor saude Timor-Leste nian, ho sira-nia ekipa asistensia medika dahuluk mai iha Dezembru 2003.
Ekipa asistensia medika dahuluk husi Xina hahu servisu mediku hodi suporta Hospital Nasional Guido Valadares iha Janeiru 2004. Kada tinan rua husi ajuda mediku Xina nian ekipa halo ona rotasaun tinan-tinan. Hahu husi neeba, iha brigada mediku xines hamutuk 123 mak serbi iha Timor Leste.
Grupu ba dala 10 husi Ekipa Ajuda Medika Xineza kompostu husi brigada medika 12 husi Komisaun Saude Provinsisl Sichuan halao ona atividade klínika gratuita lubuk ida durante tinan rua iha ospitsl nasionsl Guido Valadares no sentru saude sira seluk iha Timor Leste, iha area sira Kardiolojia, urolojia, Sirurjia Jersl, Obstetrízia no Jinokolojia, Ortopedia, Anestezia, Rehabilitasaun Medika Tradisional Xina (MTX), servisu enfermajen, medisina kuidadu intensivu, no servisu radiolojia.
Durante sira nia períodu, Ekipa Medika ba dala 10 konsege liu emerjensia ambulatoriu 19.000, ospitalizasaun 5.800, no operasaun 1.300. Ekipa nee mos halao programa divulgasaun barak, organiza misaun klínika gratuita boot liu sanulu iha area remota hanesan Atauro, Laga no Likisa fo diagnostiku, tratamentu no ai-moruk ba sidadaun Timoroan rihun ba rihun.
Aleinde nee, ekipa nee ativamente promove saude publika liuhusi halao formasaun reanimasaun kardiorespiratoria (CPR) no formasaun primeiru sokoru ba publiku, dosente iha Eskola Negosiu Timor Leste, no pesoal korporativu. Ekipa nee mos halao papel vital iha komunidade medika akademika, partisipa no apoia simpoziu sientífiku nasional no internasional hodi fahe koñesimentu no haburas dezenvolvimentu setor kuidadu saude Timor Leste nian.
Brigada Medika Xineza sanulu resin rua tuir mai nee husi Ekipa Ajuda Medika Xineza ba dala 10 kondekoradu ho Medalla Meritu no Diploma Rekonesimentu, tuir Dekretu Prezidente Republika No.101 /2025. Luo Wei (Radiologista), Xie Guoping (Urologista), Zhou Wenyi (Cozinheiro), Zeng Dongxu (Intérprete), Hou Chunmeng (Médico de I.C.U), Liu Lan (Ortopedista) lei Bibo (Anestesista), Qin Han (Cirurgião), Yang Qinggao (Cardiologista), Wang Wei (Enfermeira), Zou Wenjing (Akupunturista, Chen Liju (Ginecologista e Obstetra)
Prezidente Ramos-Horta hateten “kondekorasaun Medalla Meritu nian ba mediku dedikadu sanulu resin rua nee simboliza agradesimentu klean hosi povu Timor-Leste. Sira-nia servisu reprezenta espíritu kooperasaun internasionsl no salva ona moris ema barak, hasae ita-nia kapasidade mediku sira, no hametin ligasaun amizade no solidariedade entre ita-nia nasaun rua.” katak Prezidente.
Grupu Dala Sanulu Ekipa Ajuda Medika Xina nian konklui ona sira-nia termu servisu. Brigada medika foun sanulu resin rua husi Grupu 11 sei too iha loron 15 fulan-Outubru tinan 2025. Brigada medika xinés hotu neebe servisu iha Timor-Leste mai hosi Provínsia Sichuan husi Republika Popular Xina.
Jornalista: Emerenciana Pinto
Editor: Xisto Mendonça
