DILI, STLTIMORLESTE.com – Iha Kinta nee Prezidente Republika, Jose Ramos Horta kondekora Medalha Meritu prestijiozu ba media nasional sanulu resin rua ba sira nia kobertura esepsional ba Sua Santidade Papa Francisco nia Vizita Apostolika dahuluk mai Timor Leste, husi loron 9 too 11 Setembru 2024.
Medalha Meritu neebe estabelese tuir Dekretu Lei No. 15/2009, rekonhese kontribuisaun sira neebe destakadu hodi hametin orden sosial no promove pas no estabilidade nasional. Media onrada sira hatudu profisionalizmu ezemplar iha sira nia kobertura komprensivu kona-ba Vizita Papa, hodi fahe okaziaun importante ida nee ho mundu no dokumenta fiar klean povu Timoroan nian.
Prezidente Republika, Jose Ramos Horta liu husi diskursu iha Palasiu Prezidensial, Nicolau Lobato, Bairru Pite, Dili, Kinta (12/12/2024) hatete, ohin halibur hamutuk hodi fo rekoinesementu ou kondekorasaun medalha meritu ba orgaun komunikasaun sosial, tanba papel media mos importante.
“Media papel ida importante tebes liu husi imi nia servisu no media internasional nia, nomos media RTTL media publiku neebe premeiru vez fo out put ba mundu tomak, nee duni ami hanoin iha prezidensia ita tenke haree rekonhese fo intensive ba media sira,” dehan PR, Horta.
Xefe Estadu hatutan, media nia papel importante oinsa mak bele garante eventu importante sira.
“Kobertura klean no profisional neebe fo husi ami nia media estatal no privadu sira durante Papa Francisco nia vizita hatudu laos deit signifikadu istoriku husi okaziaun nee, maibe mos kompetensia no dedikasaun esepsional husi jornalista sira iha ita-nia nasaun”, dehan Xefe Estadu.
Iha biban nee, Prezidente Konselhu Imprensa (KI), Otelio Ote hatete, KI hatoo agradese ba Palasiu Prezidensial liu husi Prezidente Republika neebe fo kondekorasaun ba media sira, espesial ba media sira neebe mak halo kobertura durante vizita Amu Papa.
“Apresiasaun ida nee laos media ida idak deit, maibe tanba mos kontribuisaun husi ba haree nain no lee nain sira no rona nain sira hotu, no estadu merese duni fo kondekorasaun ba media nain sira neebe hatudu sira nia kompromisu sai ajente informasaun, ajente transformasaun ba publiku,” katak Prezidente KI nee.
Media nasional sira neebe mak simu Medalha Meritu no sertifikadu rekonhesimentu husi Prezidente Republika mai husi Radiu no Televizaun Timor-Leste, Empreza Publika (RTTL, E.P Ajensia Notisioza Tatoli, I.P. Grupu Media Nasional (GMN), Suara Timor Lorosae STL, Televizaun Edukasaun Timor (TVET), Diário Timor Post, Jornal Independente, Dili Post, SMNews, Hatutan.com, Fornesedor Informasaun Vídeo (VIP TV) no Lafaek News.
Iha serimonia kondekorasaun medalha ordem meritu ba orgaun komunikasaun sosial sira no entrega mos premiu ba manan nain sira husi konkursu fotografia nia kona-ba vizita Sua Santidade Papa Francisco mai Timor Leste no espozisaun ba fotografia sira iha salaun Papa Francisco Palasiu Prezidensial.
(eme)
