DILI, STLTIMORLESTE.com – Prezidente Republika (PR), José Ramos Horta kongratula Brunei Darussalam, neebe selebra Loron Nasional ba dala 41.
Iha loron Domingu nee (23/02/2025) Prezidente Republika José Ramos Horta hatoo ninia parabens ho laran tomak ba Sua Majestade Sultan Haji Hassanal Bolkiah no povu Brunei Darussalam ba okaziaun sira nia Loron Nasional ba dala 41.
Iha karta felisitasaun neebe dirije ba Sua Majestade Sultan Haji Hassanal Bolkiah, iha loron 23 fulan Fevereiru tinan 2025, Prezidente Ramos Horta destaka susesu sira neebe nia hetan ona iha lideransa Sultan Bolkiah nian no reafirma kompromisu Timor Leste nian atu hametin relasaun bilateral sira.
“Dalan ba progresu no estabilidade neebe Brunei Darussalam lao tuir ona iha lideransa Majestade nian neebe matenek no vizionariu hodi kontinua sai nuudar inspirasaun ba ita nia rejiaun,” dehan Prezidente Ramos Horta.
PR Horta dehan, rezilensia no kompromisu Timor Leste nia nasaun nian ba dezenvolvimentu sustentavel, kooperasaun rejional, no pas internasional hetan rekonhesimentu no admirasaun neebe luan.
Prezidente Republika sublinha valor neebe Timor Leste fo ba ninia amizade ho Brunei Darussalam no espresa ninia dedikasaun hodi esplora oportunidade foun ba kolaborasaun entre nasaun rua ne’e.
PR Horta dehan, Timor Leste no Brunei Darussalam iha relasaun ida neebe besik ba tempu naruk ona nuudar membru foun liu iha ASEAN. Nasaun rua nre ho sira nia dependensia makaas ba industria gas no mina rai, iha kompromisu atu diversifika sira nia ekonomia.
Brunei Darussalam entre nasaun sira dahuluk neebe estabelese relasaun diplomatika ho Timor Leste iha loron rekonhesimentu internasional iha Maiu 2002. Relasaun bilateral no parseria entre nasaun rua nee buras ba beibeik iha tinan 21 nia laran. Sua Majestade Sultan Hassanal Bolkiah konsistentemente fo apoiu ba konstrusaun institusional Timor Leste nian no ninia aspirasaun atu adere ba ASEAN.
Prezidente Ramos Horta nia mensajen mos fo sai nia dezeju ba saude diak no felisidade ba Sua Majestade no Família Real, no mos kontinua pas no prosperidade ba povu Brunei Darussalam.
(eme)
