DILI, STLTIMORLESTE.com – Prezidente Republika (PR), Jose Ramos Horta kongratula ba Fundasaun Republika Popular (FRP) Xina, neebe selebra aniversariu ba dala 76.
Iha biban nee Prezidente Republika, Jose Ramos Horta liu husi nia diskursu iha Embaixada Xina, Tersa (16/09/2025) hatoo kongratulasaun ba fundasaun Republika Popular Xina neebe selebra aniversariu ba dala 76.
“Ho laran-haksolok mak hau assosia aan ho hotu-hotu iha selebrasaun ida-nee ba tinan 76 Fundasaun Republika Popular Xina nian, okaziaun emblematika ida neebe hanoin hikas vizaun, korajen no determinasaun povu ida neebe, iha lideransa metin no inspiradora, harii nasaun moderna, avansada no reziliente,” dehan PR, Horta.
Xefe Estadu hatutan, apropriadu mos atu hanoin hikas lasu istoriku sira neebe unifika nasaun sira dezde sekulu XIV, neebe konstitui baze solida ida ba kooperasaun kontemporanea, neebe reflete laos deit kona-ba komunidade Xineza nia dinamika rezidente iha Timor-Leste, maibe mos iha sidadaun timoroan sira ho orijen xineza.
“Hau hanoin hikas hau-nia Vizita Estadu nian ba Xina, neebe halao iha loron 28 too 31 Julhu 2024, durante nee hau iha onra hasoru Prezidente XI Jinping, Primeiru-Ministru Li Qiang, Prezidente Komite Permanente Kongresu Nasional Povu nian, Zhao Leji, no dignitariu aas Xines sira seluk, hodi hametin no aprofunda ita-nia kooperasaun bilateral no multilateral,” dehan Horta.
Liu tinan 23 relasaun diplomatika formal sira, Timor-Leste no Xina kuda ona amizade ida neebe solida, bazeia ba respeitu ba malu, kooperasaun no igualdade. Importante atu hanoin katak Xina mak membru permanente dahuluk Konselhu Seguransa ONU nian neebe rekonese soberania Timor-Leste nian iha tinan 1975, hodi apoia ami iha konsolidasaun ami-nia Estadu neebe foin independente.
“Ho laran haksolok mak ami reafirma ami-nia kompromisu atu aprofunda Parseria Estratejika Abranjente, ho objetivu atu harii komunidade Xina-Timor-Leste ho futuru neebe partilladu no promove moris diak povu rua nee nian,” dehan Horta.
Xefe Estadu dehan, iha kontestu ida-nee, Governu deside atu harii Konsuladu-Jeral ida iha Changsha, Provínsia Hunan, ho jurisdisaun neebe habelar ba Provínsia Guangdong.
Partisipante neebe partisipa iha aniversariu Aniversariu ba dala-76 hosi Fundasaun Republika Popular Xina nian mak hanesan Wang Wenli, Embaixadora Republika Popular Xina iha Timor-Leste, Membru sira husi Korpu Diplomatiku, no partisipante seluk tan.
Jornalista: Emerenciana Pinto
Editora: Carme Ximenes
