DILI, STLTIMORLESTE.com – Prezidente Republika (PR), Jose Ramos Horta hatoo kongratulasaun ba Governu no Igreja neebe mak organiza ho diak no susesu vizita Sua Santidade Papa Francisco mai Timor Leste.
Iha ambitu komemorasaun Festival Rabilau, Xefe Estadu hatete, durante vizita Sua Santidade Papa Francisco iha Timor Leste esforsu barak husi entidade hotu-hotu hahu husi Primeiru Ministru (PM), Kay Rala Xanana Gusmao, tanba governu mak simu todan boot liu atu prepara Amu Papa Francisco ninia vizita, hahu iha fulan Abril 2024, nee hanesan tempu badak loos atu prepara Amu Papa nia Vizita, maibe eventu hotu lao ho diak no hakmatek.
“Hau atu hatete, preparasaun normal simu Amu Papa, tinan ida nia laran, maibe ita nia preparasaun tempu badak loos. Tanba nee hau fo parabens ba kapasidade Governu, Governu Autoridade no Igreja sira,” haktur PR Horta.
Ba povu neebe asisti hela Festival Rabilau, Prezidente Republika dehan, Lideransa Timoroan husi governu no Igreja liu husi Konfrensia Episkopal Timorense nian, neebe hatudu sira nia kapasidade ba vizita Amu Papa Francisco nia vizita mai TL.
Tanba vizita nee ema 600.000 liu mak marka prezensa iha vizita boot nee, iha Dili tenke prepara buat oin-oin ba eventu boot nee no jornalista sira hamutuk 300, kompostu husi 100 akompanha Amu Papa no 200 jornalista mai ketak, tanba nee internet lao diak, seguransa tenke masimu, lideradu husi Ministeriu Interior ba Polisia Nasional Timor Leste (PNTL), parseria ho forsa Armadas, PCIC hamutuk ho Seguransa Australia, Indonezia no buat hotu diak.
“Ba ita nia povu, liu-liu joven sira, arte marsiais hotu-hotu kolabora diak loos, nunee la iha buat ruma akontese. Hau rasik akompanha Amu Papa Francisco too nia sae iha aviaun laran, nia mak dada hau nia liman para akompanha nia ba too aviaun laran. Amu Papa Francisco hatoo lia fuan rua, primeiru husu ba lideransa sira iha TL katak, imi tau matan didiak ba povu diak ida nee, depois nia hatete fila fali, hau nunka simu resensaun diak ida nee, laos dehan kakak povu barak mak partisipa, tanba povu Timor kuaze metade mak partisipa, maibe tanba sentimentu neebe mak Amu Papa haree. Ita konsege halo vizita ida nee diak tebes-tebes, Embaixada Governu Australia apoiu makaas loos, ita agradese ba sira,” dehan PR Horta.
Prezidente Republika mos gava governu halo servisu diak loos tanba la falta bee, hahan ba populasaun, tanba loron manas boot, ema atus ba atus mak simu vizita Amu Papa Francisco. Apezar ida nee, ema hotu preparasaun simu Amu Papa ninia vizita, Governu ho Presidensial tau matan mos ba Festival Rabilau.
“Hau nuudar Prezidente fo parabens ba lideransa governu, hau nia staff Prezidensial, servisu kalan loron, lideradu husi Xefe Kaza Sivil ho Visi Xefe Kaza Sivil, Kaza Militar, sira hotu-hotu servisu makaas loos. Ohin kalan ita ensera Festival Kultural Rabilau iha fatin ida nee, hau agradese ba Autoridade Munisipiu Ainaro, kompostu husi Xefe Suku, Xefe Aldeia hotu-hotu, ba populasaun tomak iha Munisipiu Ainaro liu-liu povu Postu Administrativu Maubisi, simu ami ho diak,” deklara PR Horta.
(Eme)
