DILI, STLTIMORLESTE.com – Prezidensia Republika (PR), kontinua habelar dokumentus Franternidade Umana liu husi sosializa ba estudante sira, iha Munisipiu Baukau.
Prezidensia Republika, liu husi Asesor ba Unidade Fraternidade Umana, Nuno Horta, halao ho susesu seriu ida atividade sosializasaun ba dokumentu kona-ba Fraternidade Umana iha eskola sira iha Munisípiu Baucau laran.
Tuir komunikadu neebe STL asesu husi media Prezidensial, Segunda (22/09/2025) hatete, inisiativa nee foka ba estudante sira iha Timor-Leste tomak, no agora too ona iha Laga no Vemasse, inklui Eskola Sekundaria Katolika São João Bosco no Eskola Sekundaria Susesar Vemasse.
Kampana nee ho objetivu atu hamoris valor fundamental sira hanesan pas, respeitu mutuu, no ko-ezistensia armonioza ba jerasaun foun Timor Leste nian, alina direitamente ho vizaun Prezidente Republika, Jose Ramos-Horta nian, ba nasaun ida neebe tolerante no unifikadu liutan.
Programa nee simu ho apoiu boot no entuziazmu husi lider edukasional no administrativu lokal sira. Iha Laga, Amu Andre Belo da Costa, Diretor Eskola São João Bosco, louva inisiativa nee nuudar rekursu vital ida neebe haforsa valor universal no mos kultural timoroan nian.
Nunee mos, Flavio Antonio Gusmão, Diretor Eskola Sekundaria Vemasse, hateten katak maske prinsípiu sira-nee iha abut iha tradisaun timoroan, sosializasaun neebe foka hanesan nee importante tebes atu haforsa valor sira-nee ba juventude neebe navega iha mundu modernu nia kompleksidade. Administradora Postu Vemasse, Elda Maria Viegas Freitas, mos sublina programa nia importansia atu kapasita estudante sira hodi harii relasaun neebe forte no respeitu.
Modu neebe programa nee simu ho diak hatudu momoos nesesidade ba edukasaun bazeia ba valor hanesan nee, ho lider eskola sira hatudu sira-nia prontidaun atu integra dokumentu nia hanorin sira ba sira-nia eskola nia kultura.
Rekomendasaun xave ida neebe mosu husi sesaun sira mak apelu atu habelar liutan programa nee ba area rural sira atu asegura katak ninia mensajen kona-ba unidade no komprensaun too ba sidadaun joven timoroan hotu-hotu.
Jornalista: Emerenciana Pinto
Editora: Carme Ximenes
