DILI, STLTIMORLESTE.com – Prezidente Republika (PR), Jose Ramos Horta la konkorda Governu kontinua suspende atividade Grupu Arte Marsiais (GAM) no Arte Rituais (GAR).
Prezidente Republika, Jose Ramos Horta hatoo kestaun nee ba jornalista sira, bainhira remata partisipa asina memorandu entre Instituto Camões nomos Ministeriu Edukasaun iha EBF Farol, Dili, Kinta (03/04/2025).
Nia hatete, nia la konkorda Governu kontinua suspende atividade grupu GAM-GAR.
“Primeiru Ministru kontente loos ho evolusaun komportamentu Arte Marsiais fulan hira nia laran tiha ona laiha problema, maibe Governu kontinua halo fali bandu nee hau la konkorda, se kontinua bandu fali, tanba nee afeita ba atividade joven rihun ba rihun tanba deit komportamentu ida ka rua nia,” dehan PR, Horta.
Xefe Estadu dehan, iha setor seluk mos porzemplu iha universidade ida hanesan UNTL, ka neebe deit bele iha joven nakar joven bele halo violensia mos laos arte marsiais.
“Arte marsiais lubuk ida, estudante sira profesor iha Governu laran, entaun kuandu iha Governu laos movimentu tomak Arte Marsiais mak halo maibe elementu sira nee hanesan jogu futebol ruma iha Timor, no iha eropa neeba mos kuandu fotebol balun polisia mobiliza rihun ba rihun tanba sempre violensia, maibe la taka tiha dotebool nee mais kaer mak sira halo violensia nee, maibe prontu nee Governu mak halo laos Prezidente nia kompetensia, maibe hau la konkorda maibe nee hau entrega ba Governu hatene, maun Xanana konhese arte marsiais sira diak liu hau,” dehan PR, Horta.
(eme)
