DILI, STLTIMORLESTE.com – Prezidente Republika (PR), Jose Ramos Horta lansa muzika “tebe hamutuk o mak hau fuan” husi artista Krisdayanti Lemos.
Prezidente Republika jose Ramos-Horta lansa obra muzikal foun husi artista Krisdayanti Lemos nian nuudar meiu ba dame no empoderamentu joven sira.
Iha lansamentu ofisial ba obra muzikal foun husi Krisdayanti Lemos nian ho títulu “Tebe Hamutuk & O Mak hau Fuan”. Produser ezekutivu Raya Muzika Raul dos Reis Lemos ho orgulhu boot inisia dezenha muzika ho lian tetum tebe hamutuk neebe lansa iha Palasiu Prezidensia, iha ambitu komemorasaun tinan 50 Proklamasaun Unilateral Timor Leste neebe selebra iha Sesta (28/11/2025).
Muzika neebe Prezidente Republika lansa iha rua, iha lian tetun ho nia karakter tuir tradisaun Timor Leste nia nee hananu husi Krisdayanti hamutuk ho nia oan Amora Lemos no kolabora ho artista joven timoroan Zeferino Martins no Deoniziu de Jesus.
Iha serimonia lansamentu muzika nee, Visi Primeiru Ministru Mariano Assanami Sabino presta omenajen ba legadu global Prezidente Republika, Jose Ramos-Horta nian neebe dura ba nafatin.
Hodi salienta rekonesimentu Xefe Estadu nian husi Premiadu Nobel ba Pas too instituisaun akademika sira iha Roma, Visi Primeiru Ministru hateten, muzika foun nee serbí atu “hatuur” filozofia dame no rekonsiliasaun Prezidente Ramos-Horta nian iha okaziaun aniversariu ba dala-50 Proklamasaun Independensia TL nian.
Nia sublina, Prezidente reprezenta luta neebe la hatene kole, laos deit ba TL maibe ba direitus umanus universal no unidade multikultural, hodi afirma kontribuisaun artístika ida-nee relevante tebes bainhira nasaun nee reflete kona-ba ninia istoria.
“Hodi kompleta sentimentu sira-nee, Prezidente Ramos-Horta hatoo parabens ho ksolok ba artista nee no uza plataforma refere atu promove potensial foin-sae TL nian. Prezidente espresa ninia dezeju boot atu haree setor kreativu neebe buras, hodi aponta ba talentu foin-sae sira hanesan Amora Lemos, oan-feto husi Raul Lemos no Krisdayanti nuudar símbolu ba futuru neebe nabilan. Prezidente iha esperansa katak, jerasaun foin-sae sei kontinua sai nuudar forsa kreativa, hodi lori narativa nasaun nian ba oin liuhusi arte, hanesan jerasaun uluk neebe luta ona ba ninia Liberdade,” dehan Visi PM nee.
Serimonia nee hametin papel vital kultura nian iha konstrusaun nasaun, ho Vise-Primeiru-Ministru Assanami Sabino nota katak valor komun tenke hametin povu husi “rai ida” maski ho orijen oin-oin. Eventu nee ramata ho vizaun komun ba futuru: atu eduka labarik sira neebe hadomi dame no defende lia-loos. Lansamentu muzikal nee hamriik nudar testemuna ba viajen tinan 50 nasaun nian, hodi halo ligasaun entre Prezidente nia advokasia istorika ba sira neebe marjinalizadu no aspirasaun vibrante husi jerasaun tuir mai.
Jornalista: Emerenciana Pinto
Editora: Domingas Gomes
