DILI, STLTIMORLESTE.com – Prezidente Republika (PR), Jose Ramos Horta manifesta solidariedade ho Filipinas, hafoin devastador husi Tufaun Fung-wong.
Prezidente no Laureadu Nobel ba Pas, Jose Ramos Horta, hatoo ninia tristeza profunda no solidariedade klean liu ba povu no Governu Filipinas hafoin devastasaun neebe kauza husi tufaun Fung-wong.
Tufaun makaas nee kona rejiaun norte Filipinas, hodi rezulta lakon vida sira, deslokasaun hosi ema millaun ida resin, no estraga material sira neebe boot, iha momentu neebe maka nasaun sei rekupera hela husi destruisaun neebe maka tufaun Kalmaegi husik hela.
Iha karta formal ida neebe dirije ba Sua Exelensia Ferdinand R. Marcos Jr. Prezidente Republika Filipina, Sesta (14/11/2025) Prezidente Republika, Ramos Horta hatoo sentidu kondolensia sinseru husi povu Timor Leste.
“Ho laran-susar tebes mak hau simu notísia trajiku kona-ba devastasaun neebe kauza husi tufaun Fung-wong. Lori povu Timor-Leste nia naran, hau hakarak hatoo ba Sua Exelensia, ba Governu no ba povu Filipinas, hau-nia sinseru kondolensia no solidariedade Timor-Leste nian neebe klean liu ba família sira, no mós ba vítima sira neebe dezlokadu ka sofre tanba dezastre natural ida nee,” dehan PR, Horta.
Xefe Estadu dehan, ligasaun partilhada entre nasaun rua nee, hodi hatutan, Povu Timoroan partilha ho povu Filipina sira nia laran-susar no kompaixaun durante períodu lutu no susar ida nee.
“No ami hatoo ami nia admirasaun ba korajen, reziliensia, no espíritu ajuda malu neebe sempre karakteriza povu Filipinas nian wainhira hasoru susar,” hatete Xefe Estadu.
Prezidente Republika, Ramos Horta konklui ninia karta ho garantia ninia konsiderasaun no respeitu aas liu ba Prezidente Ferdinand R. Marcos Jr. hodi sublina lasu amizade no solidariedade neebe besik entre nasaun rua nee.
Jornalista: Emerenciana Pinto
Editora: Carme Ximenes
