DILI, STLTIMORLESTE.com – Prezidente Republika (PR), Jose Ramos Horta halo intervensaun irjente ba família defisiensia husi Hatubuilico hetan ona rekuperasaun saude no fila ba knua ho kondisaun diak.
Família defisiensia husi Aldeia Querudo, Suku Mulo, Postu Hatubuilico, Munisípiu Ainaro, neebe hetan tulun humanitariu husi Prezidente Republika, Jose Ramos Horta, agora fila fali ona ba knua hela fatin ho kondisaun diak, hafoin tratamentu durante fulan ida iha HNGV.
Avo Armando Amaral de Deus, tinan 49, neebe moras matan tinan 20 resin ona no nia oan feto Joselina de Deus defisiensia fíziku, hetan infeksaun kanek iha kotuk laran tanba monu besik iha ahi-matan. Sira moris iha uma neebe didin ho rai mutin taka ho duut manlai no laiha naroman, iha situasaun difisil tebes no perigu ba sira nia moris loron-loron.
Hafoin parteira Zélia da Silva de Jesus deteta sira iha dalan, nia hamutuk ho joven iha bairu ho naran Leo, publika informasaun nee iha rede sosial, neebe sai virál too ba Prezidente Ramos Horta, iha kalan nee kedas Prezidente orienta urjensia ba ekipa apoiu sosial Prezidensia nian.
Koordenadora Jeral Unidade Servisu Apoiu Sosial Prezidensia, Teresa dos Santos Ximenes neebe akompanha direta família defisiensia relata, “Momentu nee, Excelencia Prezidente Ramos Horta manda mensajen urjente iha kalan nee kedas no dadersan hau kontaktu ho Doutor Espesialista Prezidente nian Dr. Ariel & Dra. Yasmin hodi garante transporta mediku ba Avo Armando no nia oan feto Joselina iha Ainaro, nunee ekipa desloka kedas ba iha HNGV Dili,” dehan nia liu husi Komunikadu neebe STL asesu husi media Prezidensia Republika, Kuarta (15/10/2025).
Durante fulan ida iha HNGV, doutor sira halo operasaun mos ba avo Armando nia matan (matan-katarak) no trata infeksaun Joselina nia enfeksaun iha kotuk laran.
Agora, sira nain rua iha kondisaun diak no fila ona ba sira nia hela fatin iha Aldeia Qerudo-Hatubuilico.
Parteira Zélia da Silva de Jesus, neebe primeiru hetan sira nain rua iha dalan, agradese ba Prezidente nia laran diak ba sidadaun refere.
“Hau agradese tebes ba nai Prezidente José Ramos Horta tanba ho nia domin tomak mak bele lori hikas sira nain rua mai fali iha nee, Avo Armando nia matan komesa haree fila fali ona no Josefina mos saude diak loos ona”, hateten Parteira Zelia iha Ainaro.
Prezidensia garante mos atu konstrui uma diak ida ba sira, atu bele hela dignamente iha komunidade. Autoridade loksl, Superson Mendonça, simu fali sira nain rua ho laran kontenti no husu mos ba Governu atu kontinua fo mos prioridade ba família defisiensia seluk iha Aldeia Querudo, neebe família uma kain liu 30 mak sei hela iha kondisaun susar no seidauk asesu ba eletrisidade, dalan husi fatin refere mos seidauk iha no presija lao ain durante oras ida resin atu too dalan nasional.
Jornalista: Emerenciana
Editor: Xisto Mendonça
