DILI, STLTIMORLESTE.com – Prezidente Republika (PR), Jose Ramos Horta hatete, matebian Tom Hyland ho naran Kodigu Malae Maubere hola parte memoria istoria Timor Leste nia.
Prezidente Republika Jose Ramos Horta hatoo lia hirak nee liu husi nia diskursu iha Selebrasaun Misa Requem ba Saudozu, Tom Hyland ho naran Kodigu Malae Maubere, iha Semiteriu Bekusi, Kinta (26/12/2024).
Prezidente Republika dehan, metebian nee Prezidente nia kolega diak no metin neebe hakotu vida no ohin hakoi iha Bekusi.
Matebian servisu iha Timor Leste hahu iha 1997, mezmu krize 1999 nia la halai, tanba nee Tom hakarak mai iha nee, maibe iha nee mos iha senhor ladun konhesidu Cronson husi Amerikanu fotografu primeiru fotografia iha Timor mos hakoi hotu iha Bekusi.
“Tom Hyland Ho naran kodigu Malae Maubere hola parte memoria Timor Leste nia istoria Bonita, istoria korajen, istoria solidariedade,” katak PR Horta.
Prezidente dehan, ho laran todan, triste, halo despedida adeus ba Tom, espera nia sai ezemplu, nia uluk ema simples, PR konhese nia iha Irlanda, nia motorista super ba bus dezempregadu lakon servisu too iha nia uma haree imajen santa Kruz nee nia revoltadu, “depois fatin barak hau ba enkontru ho artista sinema balun ami konhese malu sira temi kedas M nia naran, hau respeita tebes M nia mobiliza ema lubuk ida iha Irlanda ou Amerika desidensia Irlandes,” katak Horta.
Nia hatutan, oras nee daudaun familia husi matebian Tom sente susar no triste, tanba nee Prezidente hamriik lori estadu nia naran fo korajen ba familia sira. Husu tau matan nafatin ba nia rate.
Nunee mos Ministru Negosiu Estranjeiru no koperasaun (MNEK), Bendito Freitas hatete, ohin loron hamutuk ho laran todan tebes atu halo despedida ba ema figura ida neebe iha istoria TL nia.
Ministru hatete, Matebian Tom nia domin ba Timor klean tebes no laiha rohan, ba rai no povu liu-liu ba foinsae sira sempre ho liman nakloke ho espiritu ida neebe jenerozu tebes nia kompaisaun no korajen ba Timor Leste nia potensia mak fo inspirasaun ba ema hotu neebe konhese nia.
“Prezensa Tom nia iha ita nia moris fo hanoin kona-ba modelu influensia husi solidariedade forsa neebe halibur ita hotu atu luta ba lia los no justisa, maske ita sente laran todan tanba nia fila tiha ona, ita mos selebra moris neebe nakonu ho propojitu no didikasaun,” katak nia.
Nia hatutan, lori Governu Timor Leste nia naran liu-liu MNEK neebe Tom ho nia dedikasaun makaas ba ministeriu nia. Tanba nee Ministru hatoo sentidu kondelensia no solidariedade neebe klean tebes ba matebian nia familia no amigu hotu neebe sente matebian nia diak no kompromisu.
Nia hatete ,Tom nia legadu sei horik ba nafatin iha Povu Timor Leste nia laran, deskansa em pas matebian Tom iha reinu rohan laek.
(eme)
