DILI, STLTIMORLESTE.com – Prezidente Republika (PR), Jose Ramos Horta partisipa serimonia tomada de pose ba grupu voluntariu Korpu ba Pas, hamutuk ema nain sanulu resin hitu (17) iha Hotel Timor, Dili.
Seromina tomada de pose nee halo husi Embaixadora Estadu Unidu iha Timor Leste, Donna Ann Welton, ba grupu voluntariu Korpu ba Pas hamutuk ema nain sanulu resin hitu (17).
Iha biban nee, Prezidente Republika (PR), Jose Ramos Horta ba jornalista sira iha Hotel Timor, Kinta (12/12/2024) hatete, mai iha nee atu partisipa serimonia juramentu grupu foun husi Peace corpo husi Amerika, neebe mak halo servisu voluntariu iha Timor Leste.
“Programa Peace Corpo iha Timor Leste hahu tinan 10 resin ona, hau mak uluk nee hanesan Ministru Estranjeiru, tanba nee Prezidente sempre lobi para haruka Peace Corpo, Peace Corpo nee sira ema hotu-hotu iha estudu no balun exelensia profisional la iha, tanba sira joven. No balun idade esperiensia profisional,” dehan PR, Horta.
PR Horta haktuir, sira iha prezensa iha rai atus ida resin iha mundu, programa Peace Corpo nee mai husi Prezidente Kennedy iha tinan 60, nian mak ho nia vizaun kria programa ida nee, sira mai servisu no hela komunidade kiak iha aldeia no suku sira, sira la bele hela iha Hotel no la bele hela iha Munisípiu laran, maibe tenke hela iha aldeia no suku no tenke hela ho ema kiak.
Nunee mos sira too la bele mai Dili kedas, sira konsentra iha neebe, halo estudu ba lingua, kultura Timor nian, no estuda tetun didiak, depois mak sira ba foho. Durante fulan tolu sira la bele mai Dili, fulan tolu liu mak sira bele pasiar.
“Hau sempre mai Serimonia simu foun, serimonia despedida, tanba hau hanesan padrinu ka aman sarani ba sira iha nee. No efeitu pozitivu husi misaun Peace Corpo nee diak los, tanba nee xefe estadu husu ba Peace Corpo atu tenta konsentra hanorin Ingles, tanba joven barak iha foho sira hakarak aprende Ingles, joven barak mos aprende ho sira atus ba atus. Nunee mos husu sira atu hanorin mos konetividade IT, saude publika, seguransa alimentar, hahan no inklui mos agrikultura,” dehan PR Horta.
Iha sorin seluk, Embaixadora Estadu Unidu iha Timor Leste, Donna Ann Welton hatutan, ohin nia fo pose ba Korpu volunatiu nain 17.
“Hau hakarak uza momentu balun, hau fó pose ba ami nia klase foun hamutuk ema nian 17, hodi ezerse hau nian admirasaun no apresiasaun ba misaun servisu. No dezenvolvimentu neebe ita boot sira sei kolaborasaun, Peace Corpo muda ema barak nia moris, nia sei muda ita boot sira nian moris no sei muda ita boot sira nia família no inklui komunidade sira, ita boot sira sei halo deferensia ida ho Timoroan tomak,” dehan nia.
Embaixadora mos hatoo parabens ba voluntariu foun sira husi Corpo ba Pas neebe adminitradu tebes ho sira nia paixaun atu hadia dezenvolvimentu ekonomiku komunitariu ho edukasaun ida iha Timor Leste.
Nunee mos Reprezenta Korpu Voluntáriu mai iha Timor Leste, Ian Bar hatete, semana sanulu liuba, hahu viajen ho ema nain sanulu resin hitu neebe la konhese malu sae aviaun hamutuk atu mai Timor Leste. Nasaun kiik ida neebe sira nunka rona nia naran, neebe nakonu ho ema neebe seidauk konese. Durante tempu badak nia laran sira iha nee, aprende barak tiha ona. Durante tinan rua oin mai, sira sei servisu iha nee, espera bele aprende barak liu tan.
Nia hatete, agradese tebes hodi hela iha Timor Leste, no kontente tebes atu hahů serbisu hamutuk ho komunidade no ho Korpu da Pas.
“Ami voluntariu sira hotu mai husi fatin neebe la hanesan, moris neebe la hanesan, no fiar neebe la hanesan, ami mai Timor hodi serbisu hamutuk ho nafatin Timoroan sira neebe mai husi munisipiu la hanesan, kultura neebe la hanesan, no koalia lian neebe la hanesan. Maibe ami hotu iha sentimentu ida neebe hanesan, sentimentu esperansa ba futuru Timor nian,” katak nia.
Nia dehan, voluntariu Korpu ba Pas mesak labele halo buat ida, bainhira la envolve Timoroan sira. Korpu na Pas sira hotu iha mundu tomak labele halo buat-ida la ho ema husi nasaun sira neebe sira ba hotu-hotu tenke lao hamutuk, se karik hakarak susesu.
(eme)
