DILI, STLTIMORLESTE.com – Prezidente Republika (PR), Jose Ramos Horta hatete, nia ba Abu Dhabi partisipa Simeira Premiu Zayed ba Fraternidade Umana iha Abu Dhabi, Emiradus Árabes Unidus, tanba nia mos uluk hanesan Juri.
Prezidente Republika Jose Ramos Horta hatoo lia hirak nee ba jornalista sira, bainhira remata partisipa Simeira Premiu Zayed ba Fraternidade Umana iha Abu Dhabi, Emiradus Árabes Unidus no fila hikas mai Timor Leste iha Aeroportu Internasional Nicolao Lobato, Komoro kuarta (05/02/2025).
Simeira Premiu Zayed ba Fraternidade Umanu iha Abu Dhabi, Emiradus Árabes Unidus Eventu neebe organiza husi Juis Mohamed Abdelsalam, Sekretariu Jeral husi Komite Superior ba Fraternidade Umana, halibur líder global sira no defensor sira ba dame.
“Hau ba Abu Dhabi neebe sede mundial ba premiu Franternidade Umana, uluk hau hola parte juri mos, tanba asuntu bilateral ruma atu koalia ho liurai boot iha neeba, entau hau ba no sira konvida hau partisipa,” dehan PR Horta.
Iha biban nee, Prezidente dehan, tempu badak semana ida nee enjenheiru sira ho ekipamentu too Timor Leste para hahu konstrusaun ba kompleksu rezidensial iha Balide no ida nee Liurai boot husi Abu Dhabi mak oferese.
“Iha tempu badak semana ida nee enjenheiru sira ho ekipamentu too para hahu konstrusaun ba kompleksu rezidensia iha Balide, neebe hau koalia tiha ona dala ruma Liurai boot husi Abu Dhabi mak oferese, hau nia pedidu ba nia tinan hirak liu ba, prosesu nee lao aselera, sira hatudu dezenhu ba hau, dezenhu modernu no kapaas los sei sai hanesan edifisiu neebe mais modernu liu no bonitu liu iha Timor Leste, kompanhia ida neebe Abu Dhabi sempre kontratu, buat hotu-hotu sira halo iha rai liur iha Indonezia ka Afrika, Emiratus Arabe oferese ajuda kompanhia ida mak halo, maibe hamutuk ho arkitetu ida Timorense, Salvador pires, hau mak hili servisu hamutuk para halo edifisiu nee bele akomoda too feto oan atus lima,” katak PR Horta.
Prezidente dehan, edefisiu nee jestaun husi Relijiozu Canociano sira, ida nee mak importante liu.
Durante iha Abu Dhabi, Prezidente Ramos Horta halo reflesaun kona-ba Papa nia vizita no dalan ba pas, iha entrevista ho Vatican News, Prezidente Jose Ramos Horta deskreve Papa Francisco nia vizita mai Timor Leste hanesan momentu ida “inkrível” neebe atrai ema besik rihun 700. Koalia husi Abu Dhabi, iha neebe Prezidente partisipa iha eventu sira neebe marka aniversariu Dokumentu Fraternidade Umana nian.
Aleinde nee Prezidente Republika hasoru malu ho Adama Dieng, Enviadu Espesiál Uniaun Afrikana ba Prevensaun Jenosídiu no Atrosidade Masal, iha Otél St. Regis, iha Abu Dhabi. Enkontru nee halao iha marjen husi Simeira Premiu Zayed ba Fraternidade Umanu neebe halao iha kapitál Emiradus Árabes Unidus.
Iha hasoru malu nee líder nain rua neebe iha amizade pesoal ida neebe kleur ona, kolabora ona iha inisiativa internasional oin-oin neebe foka ba dame no direitus umanus. Sira nia parseria hatudu notavelmente iha sira nia apelu urjente konjuntu ba komunidade internasional kona-ba krize umanitaria iha Haiti.
Prezidente Republika hatoo diskursu prinsipal iha abertura Simeira Premiu Zayed ba Fraternidade Umana iha Abu Dhabi, Emiradus Árabes Unidus. Eventu neebe organiza husi Juis Mohamed Abdelsalam, Sekretariu Jeral husi Komite Superior ba Fraternidade Umana, halibur líder global sira no defensor sira ba dame.
Aleinde nee Prezidente Republika, Jose Ramos Horta hasoru malu ho Ekaterina Zagladina, Prezidente Sekretariadu Permanente Simeira Mundial Laureadu Nobel ba Pas nian, ba matabisu trabalhu. Enkontru neebe partisipa mos husi Embaixadora Sónia Neto, halao iha marjen Simeira Premiu Zayed ba Fraternidade Umana.
Prezidente Republika, Jose Ramos Horta halao enkontru informal badak ida ho Primeira Dama Kolombia nian, Verónica Alcocer, iha Abu Dhabi. Enkontru nee halao iha marjen husi Simeira Premiu Zayed ba Fraternidade Umanu, neebe halao iha kapital Emiradu Árabe Unidu nian husi loron 3 too 4 Fevereiru 2025.
Prezidente Republika, Jose Ramos Horta halao enkontru informal badak ida ho Juiz Mohamed Abdelsalam, Sekretariu Jeral Komite Superior ba Fraternidade Umana, iha Abu Dhabi. Enkontru nee halao iha marjen husi Simeira Premiu Zayed ba Fraternidade Umanu, neebe maka halao iha kapital Emiradus Árabes Unidus nian husi loron 3 too 4 Fevereiru 2025.
Prezidente Republika halao enkontru informal badak ida ho Sua Alteza Xei Nahyan Bin Mubarak Al Nahyan, Ministru Toleransia no Konvivensia Emiradus Árabes Unidus nian, iha Abu Dhabi.
(eme)
