DILI, STLTIMORLESTE.com – Prezidente Republika (PR), Jose Ramos Horta hahu vizita privada ka trabalhu ba Melbourne iha loron 12 no 13 Agostu, nuudar konvidadu onra iha Simeira Australia kona-ba Redusaun Emisaun ba dala 12, neebe organiza husi Institutu Merkadu Karbonu (CMI).
Partisipasaun Prezidente Republika nian destaka kompromisu Timor Leste nian ba asaun global kona ba mudansa klimatika, dezenvolvimentu sustentwvel, no kooperasaun rejional. Nuudar nasaun ida neebe vulneravel liu ba mudansa klimatika, Timor-Leste buka atu amplifika nesesidade urjente ba justisa klimatika, finansiamentu ekuitativu, no solusaun kolaborativa hodi mitiga ameasa ambiental sira.
Durante nia vizita, Prezidente Republika, Jose Ramos Horta sei hatoo diskursu prinsipal iha Jantar Gala Simeira nian iha loron 13 Agostu, neebe nia sei destaka Timor-Leste nia vulnerabilidade klimatika, atualiza Kontribuisaun Nasional Determinada (NDC), no papel kritiku hosi apoiu internasionwl hodi harii reziliensia.
Prezidente Republika mos sei sublina lideransa Australia nian iha avansu kooperasaun klimatika rejional, liu-liu bainhira Australia prepara atu submete ninia meta akordu Paris 2035.
“Mudansa klimatika laos ameasa ida neebe dook ida nee krize atusl ida ba Timor-Leste no ita nia vizinu Pasífiku sira. Iha Simeira ida nee, hau sei sublina katak ambisaun glob net-zero tenke inklui justisa, finansiamentu, no apoiu konkretu ba sira neebe kontribui menus ba emisaun maibe sofre todan liu. Australia nia lideransa importante tebes, no hamutuk, ita tenke asegura katak la iha komunidade ida mak husik hela iha kotuk iha luta ba futuru sustentavel,” deha Xefe Estadu.
Nunee mos iha loron dahuluk iha Melbourne, Prezidente Republika sei kondekora Orden Timor Leste nian ba distintu individu no organizasaun sira, neebe fo ona kontribuisaun signifikativu ba dezenvolvimentu no esforsu humanitariu Timor-Leste nian.
Vizita nee sei inklui mos performansa kultural espesial husi Eskola Koru Boite nian, hodi komemora tinan 50 husi migrasaun Timor Leste nian ba Australia.
Entretantu Prezidente Republika, Jose Ramos Horta sei vizita mps Corner Store Cafe maior torrefadora Australia nian ba kafe timoroan nian, hodi destaka importansia komersiu sustentavel no inisiativa ekonomia lidera husi komunidade.
(eme)
