DILI, STLTIMORLESTE.com – Prezidente Republika Jose Ramos partisipa XV konferensia ba Xefe Estadu no Governu CPLP nia iha Guinea-Bissau.
Iha loron Tersa nee (15/07/2025) Prezidente Republika Jose Ramos Horta hahu viajen ba Guinea-Bissau hodi partisipa iha XV Konferensia ba Xefe Estadu no Governu CPLP nian.
Simeira neebe halao iha Prezidensia Jeneral Umaro Sissoco Embalo, Prezidente Republika Guinea-Bissau marka aniversariu CPLP nian ba dala 29 ho sentru iha tema “CPLP no Soberania Alimentar Dalan ida ba Dezenvolvimentu Sustentavel. Líder sira CPLP nian sei diskute dezafiu urjente sira, inklui kooperasaun rejional, seguransa alimentar, no reziliensia ekonomika.
Prezidente Ramos Horta sei partilha Timor Leste nia kompromisu ba multilateralizmu, hodi afirma “Soberania alimentar laos deit imperativu ekonomiku ida maibe moral ida.
“Nuudar komunidade ida neebe kesi ho lian no istoria hanesan, CPLP tenke defende agrikultura sustentavel, fo kbiit ba agrikultor kiik sira, no asegura katak laiha Estadu-membru ida mak husik hela iha kotuk iha ita nia hakarak hodi atinji ba dezenvolvimentu ekuitativu,” dehan Prezidente Republika Jose Ramos Horta.
Rezultadu prinsipal sira husi Simeira nee inklui Adosaun Deklarasaun Bissau, reforsa kompromisu CPLP nian ba soberania alimentar no reziliensia klimatika Eleisaun Guinea-Bissau nuudar Prezidente Pro Tempore CPLP nian (2025-2027) Aprezentasaun Premiu “Jose Aparecido de Oliveira” ba distintu xefe sira, inklui eis-Prezidente mosambikanu Joaquim Chissano.
Prezidente mos sei halao enkontru bilateral sira, hodi hametin Timor Leste nia parseria sira iha komersiu, edukasaun no sustentabilidade ambiental iha mundu luzofonu.
Prezidente Ramos Horta sei konklui nia vizita iha Guine Bissau iha loron 19 fulan-jullu tinan 2025.
(eme)
