DILI, STLTIMORLESTE.com – Prezidente Republika (PR), Jose Ramos Horta hatete, nia konvida Primeiru Ministru nomos Kardeal atu halo abertura Festival Prezepiu no Feira Natal, neebe halao iha Palasiu Prezidensial, Nicolau Lobato, Dili.
Xefe Estadu hatoo lia hirak nee ba jornalista sira iha Palasiu Prezidensial, Nicolau Lobato, Bairo Pite, Dili, Kinta (12/12/2024).
PR hatete, Palasiu Prezidensial iha Kinta lokraik sei halo serimonia abertura Festival Prezepiu nomos Feira Natal neebe mak halao iha Palasiu Prezidensial.
Ho feira Natal no Festival Prezepiu nee halo Primeiru Ministru, Kay Rala Xanana Gusmão mos sente kontente, ida nee promove kualidade Timor Leste nia katolizmu.
“Festa boot liu iha Timor Leste mak Natal, tanba nee mak hau rasik lansa fali, hadia fila fali programa prezepiu iha Timor, no kada tinan sei boot liu tan turista husi mundu mai, so para haree deit prezesipiu iha Timor, neineik sei too iha neeba,” katak PR, Horta.
Prezidente Republika, Jose Ramos Horta hatete, nia mos koalia ho Primeiru Ministru oinsa mak bele prepara atividade neebe mak sei halao iha tinan 2025, tanba Timor Leste mos sei tama iha ASEAN 2025, tanba nee organiza aan didiak ho onestidade.
Nunee mos Primeiru Ministru, Kay Rala Xanana Gusmão hatete, ohin halao enkontru ho PR Horta husu Primeiru Ministru atu mai akompanha halo abertura ba prezepiu iha Palasiu Prezidensial tuku 5 lokraik, ida nee hatudu katak Timoroan iha duni kreatividade iha fatin balun labarik deit mak halo furak los, tanba too dezembru buat ruma la akontese iha rai laran.
“Kontente tebes tanba joven sira asumi dever boot ida husi joven sira kria estabilidade, no harmonia iha ita nia rai neebe buat balu kona-ba 2025 koalia ho Prezidente, maibe hau seidauk bele loke husik Prezidente mak loke ba imi,” hatete PM, Xanana.
(eme)
