DILI, STLTIMORLESTE.com – Prezidente Republika (PR) Jose Ramos Horta ho Primeiru Ministru Kay Rala Xanana Gusmão diskute hela oinsa mak halo kooperasaun ho Vietnam iha area saude.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha palasiu Prezidensial Nikolao Lobato, Bairo Pite, Kinta (06/03/2025).
Primeiru Ministru dehan, iha hasoru malu nee koalia oinsa Timor Leste estabelese kooperasaun ho Brunei Darussalam iha area saude.
“Ami nain rua Prezidente Republika koalia kona-ba kooperasaun ho Brunei Darussalam iha area saude atu halo teste ida ba mediku espesialista Timoroan sira. Ezemplu mediku espesialista kona-ba moras fuan nian bele ba aprende tan iha Brunei Darussalam, no mai fali la presiza haruka ema ho moras fuan ba halao tratamentu iha Malazia no Singapura, bele iha deit Timor,” dehan PM Xanana.
Durante enkontru nee mos Prezidente Republika informa ba PM Xanana kona-ba foin lalais nee halao vizita ida ba hospital iha Atambua nian, haree fasilidade saude diak no avansadu tebes. Tanba nee Xefe Estadu rekomenda ba Governu oinsa bele haree atu fasilita Timoroan sira neebe moras bele ba deit iha Atambua no la presiza ba too Malazia ho Singapura.
Primeiru Ministru dehan, iha hasoru malu nee lider nain rua koalia kona-ba kolaborasaun ho Brunei, tanba nasaun Brunei atendimentu ho diak. Tanba nee bele kolabora ho Brunei iha setor saude hodi fo formasaun ba mediku sira.
Esplika katak, Governu sei kolabora ho Brunei hodi fo formasaun sirurjika ba mediku espesialista kardíaku sira durante tinan 1.
Xefe Governu dehan, mediku sira bele aprende oinsa atu halo operasaun ho lo-loos, nunee sira bele sai espesialista ba moras fuan no ikus mai fila fali mai Timor Leste, la presiza haruka ema moras fuan ba han ai-fuan iha Malazia, Singapura, Australia.
Iha biban nee, PM Xanana hatutan, Primeiru Ministru (PM) Vietnam, Pham Minh Chinh sei halao vizita mai Timor Leste (TL) hodi hametin liu tan kooperasaun bilateral entre rai rua. Vizita Pham Minh Chinh iha TL nee hanesan vizita ofisial, tanba foin lalais Prezidente Republika (PR), Jose Ramos Horta halao vizita ba Vietnam konsege hasoru malu koalia kona-ba hametin relasaun diplomatika, inklui diskusaun kona-ba kooperasaun no dezenvolvimentu rejional.
Aleinde nee Primeiru Ministru, Kay Rala Xanana Gusmão hatete, uluk iha funu nia halo tratamentu ho aimoruk tradisional iha Lospalos.
“Loos duni ferik mate tiha ona, tinan liu ba nee ami ba hakoi tiha, nia araska kotuk laran lao labele tiha deit iha fatin nee, ho adjuntu ida mos mate iha ailaran, nia inan nia mak loron-loron fo han batar daan fo mos aimoruk Timor nian. Hau iha Cipinan mak hemu aimoruk loron tolu nia laran hau atu soe bee moras fatuk haat ka lima haksoit. Ita lakon tiha funu iha 1979, rende hotu, mate, hahu fali guerrilha nee 1980 too 1999, tinan 19, atan oan hau rasik sei la haluha,” hakotu nia.
(eme)
