DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru (PM), Kay Rala Xanana Gusmão diskute ona atu reativa Grupu Arte Marsiais (GAM) no Grupu Arte Rituais (GAR), maibe desizaun iha Konselhu Ministru.
Lia hirak nee hatoo husi Prezidente Republika, Jose Ramos Horta ba jornalista sira, bainhira remata distribui nesesidade baziku ba komunidade kbiit natoon sira iha Kovalima, Kuarta (26/03/2025).
Prezidente Republika dehan, foin daudaun mos deskansa iha Ainaro, tanba husi Dili loraik tanba iha enkontru balu, entau deskansa oituan iha Ainaro hodi koalia oituan ho Konselheiru Prinsipal no Konselheiru Masimu Partidu KHUNTO, Naimori Bukar.
Tuir Prezidente Republika nia observasaun iha fulan hira nia laran, juventude neebe inklina aan iha GAM no GAR hatudu sira nia komportamentu diak, hatudu kontribuisaun no hametin dame diak.
“Hotu-hotu hatene iha deputadu sira bankada iha Parlamentu Nasional koalia halimar no koalia mos kona-ba situasaun seguransa iha rai laran, Partidu KHUNTO ho organizaun sira seluk, ita iha fulan sira nia laran nee hatudu ona halo kontribuisaun diak hametin dame hamate violensia, hau ho Primeiru Ministru koalia tiha ona, foin daudaun Kinta feira koalia fali ho ida nee Konselhu Ministru mak sei halo desizaun foti ka la foti bandu atividade,” Katak PR Horta.
Prezidente Republika hatete, kona-ba atu reativa GAM no GAR nee Prezidente Republika fo rekomendasaun kleur ona.
“Hau nia rekomendasaun mak hotu-hotu hatene ona kleur tiha ona, hau rekomenda para halo tiha levantamentu foti tiha bandu nee konaba atividade arte marsias,” hakotu nia.
Antes nee Prezidente Republika, Jose Ramos Horta hatete, GAM no GAR hatudu komportamentu diak iha vizita Sua Santidade Papa Francisco mai iha Timor Leste.
(eme)
